Свята для школьнікаў "Горад у бяспецы" адбудзецца 1 верасня ў Віцебску
Свята "Горад у бяспецы" арганізуюць для юных жыхароў Віцебска ў Парку Пераможцаў 1 верасня. Маштабнае мерапрыемства стане першай у рэгіёне падзеяй дзесяцідзённай рэспубліканскай акцыі "Адзіны дзень бяспекі", паведамілі ў Віцебскім абласным упраўленні МНС.
Насычаная праграма ўключае паказальныя выступленні, у тым ліку дэманстрацыю ліквідацыі надзвычайных сітуацый на сушы і вадзе, паветранае дэсантаванне, майстар-класы па аказанні першай дапамогі, інтэрактыўныя навучальныя пляцоўкі, байкер-шоў, брэйк-данс-шоў, лазертаг-біятлон, шоу трансформераў, бітву робатаў і замкаў, турнір па паяданні сасісак, аквагрым-зоны, флэшмобы, конкурсы ад забаўляльных цэнтраў горада і многае іншае. Дапамогуць стварыць святочную атмасферу лепшыя дзіцячыя танцавальныя і вакальныя студыі Віцебска.
Асноўныя арганізатары мерапрыемства – рэгіянальныя падраздзяленні МНС, ДАІ, БТЧК. Свой уклад унеслі і іншыя арганізацыі і грамадскія аб'яднанні.