Свята «Дзвіна-Дзвіна-Daugava» сабрала ў Верхнядзвінску больш за 500 юных талентаў Беларусі, Расіі і Латвіі
Назву гэтаму фестывалю дала рака, якая аб’ядноўвае тры народы. Традыцыя зарадзілася ў 1999 годзе, і вось ужо ў семнаццаты раз дагледжаны і памаладзелы Верхнядзвінск ветліва сустракаў дарагіх гасцей. Свята пачалося з флэшмоба на цэнтральнай плошчы горада, за якім рушыў услед відовішны мотапарад байкераў, якія прыехалі з розных гарадоў Віцебшчыны. А затым сваё філіграннае майстэрства прадэманстраваў ансамбль барабаншчыц Верхнядзвінскай дзіцячай школы мастацтваў. Пасля эфектнага дэфіле дзяўчаты ўзначалілі ўрачыстае шэсце дэлегацый і на ўсім шляху задавалі рытм калоне, выклікаючы ўсеагульны захапленне.
Асноўнае дзеянне разгарнулася ў парку на беразе Дзвіны, тэрыторыя якога ператварылася ў сапраўднае казачнае мястэчка для дзятвы. Тут працавалі разнастайныя выставы, гульнёвыя пляцоўкі, атракцыёны, ладзіліся вясёлыя забавы, конкурсы і спартыўна-забаўляльныя мерапрыемствы. А ў цэнтры ўвагі, вядома ж, былі юныя артысты. Спачатку іх усіх запрасілі на галоўную сцэнічную пляцоўку, упрыгожаную ветразямі «Карабля дружбы» – сімвала фестывалю.
– Ідэя свята, – сказала, прывітаўшы ўдзельнікаў, старшыня раённага Савета дэпутатаў Ірына Козел, – як нельга лепш увасабляе гістарычнае прызначэнне прыгранічнага верхнядзвінскага рэгіёна – умацоўваць дружбу і ўзаемаразуменне паміж суседнімі дзяржавамі. Мы заўсёды адкрыты для кантактаў і рады, што іх геаграфія пастаянна пашыраецца.
З расійскім Себежам, латвійскімі Дагдай і Краславай Верхнядзвінск звязваюць шматгадовыя партнёрскія сувязі на аснове пагадненняў аб супрацоўніцтве. А нядаўна аналагічны дагавор быў падпісаны з горадам Кінгісеп Ленабласці, прадстаўнікі якога ўпершыню выступілі на фестывалі. Акрамя таго, яркія фарбы ў палітру творчасці дадалі калектывы з Віцебска, Глыбокага, Дубровіцы, Роснаў, Чашнікаў, Гарадка, Мінска. Да самага вечара ўдзельнікі гала-канцэрта «Дзяцінства – гэта я і ты» радавалі сваімі талентамі гледачоў. Латгальскія народныя песні перагукваліся з шчырымі беларускімі напевамі, змяняліся танцамі, характэрнымі для Пскоўскай вобласці, і запальнымі сучаснымі кампазіцыямі, выступленнямі музыкантаў, вакалістаў, тэатраў мод.
У завяршэнне гала-канцэрта намеснік старшыні Верхнядзвінскага райвыканкама Таццяна Севалкіна ўручыла ўдзельнікам дыпломы і сувеніры і шчыра падзякавала ўсіх, хто дапамог арганізаваць свята дзяцінства, творчасці і натхнення.
– Мы вельмі рады, што прыехалі. Тут выдатная атмасфера, адчуваецца сапраўднае свята, – падзялілася ўражаннямі мама сямігадовай Насці Малчанавай з россонскай узорнай студыі «Надзея».
Высокі ўзровень арганізацыі фестывалю і гасціннасць беларусаў адзначыла заслужаны работнік культуры Расійскай Федэрацыі Ларыса Ізотава з Себежа. А кіраўнік танцавальнага калектыву «Эжэзерс» з Дагды Рыта Вайшля расказала, што абмен вопытам на такім прадстаўнічым форуме вельмі карысны для дзяцей. Адзін канцэрт замяняе дзесяць рэпетыцый, да таго ж хлопцы могуць пазнаёміцца і пагутарыць з аднагодкамі, цікава правесці час і выдатна адпачыць.
Ларыса МАЛАШЭНЯ, фота аўтара. "Віцебскія весці".