Свята цыркавога мастацтва «Арэна-2019» сабрала ў Воршы больш за 20 калектываў з Беларусі і Расіі
Аршанцы і госці горада ўбачылі незабыўнае шоу з выступленнем акрабатаў, паветраных гімнастаў, эквілібрыстаў, артыстаў арыгінальнага жанру, дрэсіраваных жывёл.
– У рэспубліцы склалася цэльная сістэма правядзення мерапрыемстваў у сферы цыркавога мастацтва, дзе ўлічваюцца ўсе жанравыя напрамкі. І яна ахоплівае ўсе рэгіёны краіны, – адзначыў у гутарцы з журналістамі кансультант упраўлення ўстаноў культуры і народнай творчасці Міністэрства культуры Беларусі Іван Галабурда.
Пра тое, што горад на Дняпры невыпадкова выбраны месцам правядзення свята, сказаў старшыня журы, заслужаны дзеяч культуры Рэспублікі Беларусь Якаў Лобавіч.
– Толькі ў Воршы сканцэнтравана такая колькасць цыркавых калектываў, – адзначыў ён. – Тут ёсць свае традыцыі, на якіх можна вучыцца. Вельмі важна, што ў нашай краіне надаецца велізарная ўвага цыркавому мастацтву, асабліва працы з дзецьмі. Мы даём ім магчымасць развівацца і ўдасканальвацца.
Члены журы і арганізатары падкрэслілі зацікаўленасць мясцовых органаў улады ў правядзенні такога роду мерапрыемстваў.
– Як і навагоднія святы, што набліжаюцца, цырк – гэта чараўніцтва, – сказаў намеснік старшыні Аршанскага райвыканкама Віктар Калачоў. – Няхай гэта сімвалізуе шчасце і дабро для ўсіх нас.
Цыркавыя артысты выступілі ў дзвюх узроставых групах: да 15 гадоў, 16 гадоў і старэйшыя. У кожнай з намінацый вызначылі лаўрэатаў I – III ступеняў. Сімвалічна, што прызы былі з гліны – матэрыялу такога ж пластычнага і жывога, як сам цырк.
