Прадпрыемства «Вік — здароўе жывёл» прызнана лепшым рэзідэнтам СЭЗ «Віцебск»

У 2013 годзе замежнае прадпрыемства «Вік — здароўе жывёл» накіравала на развіццё вытворчасці ветпрэпаратаў больш за 1 млн долараў. І ў 2014-м кампанія не мае намеру зніжаць інвестыцыйную актыўнасць, якая спатрэбіцца для рэалізацыі маштабнай праграмы мадэрнізацыі.

Па выніках працы ў мінулым годзе прадпрыемства прызнана лепшым рэзідэнтам СЭЗ «Віцебск». Цырымонія ўзнагароджання сімвалічным ганаровым сцягам перадавіка адбылася днямі ў адміністрацыі СЭЗ.

Як паведаміў «Віцебскім навінам» яго дырэктар Алег Чакункоў, асноўны аб'ём інвестыцыйных укладанняў у 2013-м быў накіраваны на будаўніцтва цэха вытворчасці касметычных сродкаў па доглядзе за хатнімі жывёламі. Працэс абнаўлення на «Вік — здароўе жывёл» не спыняецца фактычна з моманту пачатку яго дзейнасці ў 2002 годзе. Сёння ў інвестыцыйным партфелі прадпрыемства — мадэрнізацыя вытворчасці таблетак, лініі па выпуску парашковых форм прэпаратаў, а таксама будаўніцтва склада гатовай прадукцыі. Мяркуемы аб'ём капітальных укладанняў складзе ў 2014-м не менш за 1,2 — 1,3 млн долараў. Дарэчы, каля 95% прадукцыі «Вік — здароўе жывёл» экспартуе ў асноўным у Расію, а таксама Казахстан і Узбекістан.

У цэлым для рэзідэнтаў СЭЗ «Віцебск» мінулы год склаўся неадназначна, хоць большасць прагнозных параметраў фінансава-гаспадарчай дзейнасці выканаць удалося. Напрыклад, аб'ём прыцягнутых замежных інвестыцый у памеры 118 млн долараў стаў рэкордным за гісторыю СЭЗ, у тым ліку па прамых інвестыцыях на чыстай аснове (49,5 млн долараў) заданне перавыканана амаль удвая. Найбольшы ўклад унеслі СП «Чэс-Бел», ААТ «Аршанскі авіярамонтны завод», ІП ТАА «ЛІНПАК Пекэджынг Іст».

За дасягненне высокіх паказчыкаў сацыяльна-эканамічнага развіцця ў 2013 годзе ўзнагароджаны граматамі ТАА

«Альянспласт», ААТ «Віцебскія дываны», ААТ «Канструктарскае бюро «Дысплей», СААТ «Натрыкс», УП «Палімерканструкцыя», ІААТ «Продэксим», ТАА «ПРА «Энергакамплект».

У 2014 годзе рэзідэнтам СЭЗ

«Віцебск» трэба будзе планаваць сваю дзейнасць такім чынам, каб нарасціць экспарт прадукцыі на 16%, паслуг — на 10%, прыцягнуць не менш за 35 млн долараў прамых замежных інвестыцый на чыстай аснове.

Сяргей Антоновіч, "Віцебскія весці"