Прадпрымальнікам неабходна праяўляць больш эканамічнай ініцыятывы - А.Косінец

2 снежня, Віцебск /Дзіяна Курыла - БЕЛТА/. Старшыня Віцебскага аблвыканкама Аляксандр Косінец заклікаў прадпрымальнікаў праяўляць больш ініцыятывы і актыўней уключацца ў інвестыцыйную дзейнасць рэгіёна. Аб гэтым ён заявіў сёння на сустрэчы з прадстаўнікамі малога і сярэдняга бізнесу Віцебскай вобласці, перадае карэспандэнт БЕЛТА. У вобласці распрацавана 25 інвестыцыйных праграм на 2011-2015 гады з агульным аб'ёмам інвестыцый Br12 трлн. Яны накіраваны на развіццё розных галін эканомікі: ад малой энергетыкі да турызму і культуры. На думку губернатара, у гэтых праграмах ёсць месца для малога бізнесу і прыватнай ініцыятывы. Так, малому бізнесу павінна належаць ініцыятыва стварэння ў Віцебскай вобласці парка высокіх тэхналогій. Прыцягненне прыватных будаўнічых кампаній дапаможа ажыццявіць планы па ўзвядзенні новых аб'ектаў і рэканструкцыі дзеючых. У сельскай гаспадарцы фермерам можна звярнуць увагу на такія галіны, як жывёлагадоўля і пладаводства. Прыдарожны сэрвіс, інфраструктура турызму будуць актыўней развівацца, калі за іх возьмецца прыватнік. "У нас няма абмежаванняў для дзейнасці прадпрымальнікаў", - падкрэсліў Аляксандр Косінец. У сваю чаргу старшыня аблвыканкама абяцаў усебаковую дапамогу недзяржаўнаму сектару эканомікі. Значна вырастуць выдаткі на падтрымку прадпрымальніцтва. На працягу бліжэйшых двух гадоў на праграму развіцця прадпрымальніцтва і будаўніцтва бізнес-цэнтра з бюджэту прадугледжана вылучыць звыш Br50 млрд. Бізнес-цэнтр стане месцам, дзе на льготных умовах малому бізнесу будуць прадастаўлены офісныя памяшканні, размесціцца інкубатар малога бізнесу. Прыватныя будаўнічыя кампаніі атрымаюць доступ да доўгатэрміновых планаў будаўніцтва аб'ектаў, даручэнне аб гэтым было дадзена прама на сустрэчы. Акрамя таго, прадпрымальнікам прапанавана прыняць удзел у распрацоўцы рэгіянальнай праграмы падтрымкі прадпрымальніцтва на 2011-2012 гады. Разам з тым Аляксандр Косінец падкрэсліў, што сумленнасць і добрасумленнасць павінны заставацца адметнай рысай прадпрымальнікаў. Недапушчальна выплачваць заработную плату ў канвертах, весці справы ў абыход закона. "За вамі стаяць нашы людзі, якія за сваю працу павінны атрымліваць годнае заработнае плату. Ад дабрабыту людзей будзе залежаць дабрабыт дзяржавы", - дадаў ён. У Віцебскай вобласці ў цяперашні час зарэгістравана 7,6 тыс. юрыдычных асоб без ведамаснага падпарадкавання, больш за 29 тыс. індывідуальных прадпрымальнікаў. Удзельная вага прыватнага бізнесу ў агульным аб'ёме вытворчасці рэгіёна складае 7,8%. Да 2015 года плануецца гэты паказчык павялічыць да 15,2%. -0-