Старшыня аблвыканкама Мікалай Шарснёў правёў сустрэчу і прыём па асабістых пытаннях у ААТ «КІМ»
Гэта прадпрыемства перажывае складаны перыяд. Уласных сродкаў на яго тэхнічнае пераўзбраенне недаставала. Складзеная эканамічная сітуацыя не дазволіла рэалізаваць праект па далучэнні прадпрыемства да «Белвеста», і на сённяшні дзень адкрытае акцыянернае таварыства мае вялікія даўгі па заработнай плаце, выплатах у фонд сацыяльнай абароны насельніцтва, падатках, аплаце энергетычных рэсурсаў. «КІМ» знаходзіцца ў працэдуры банкруцтва, і ў першых чыслах мая ў эканамічным судзе вобласці будзе разгледжаны другі этап яе ажыццяўлення.
Кіраўніцтва вобласці і горада шукае магчымасці для пагашэння запазычанасці па заработнай плаце, дзіцячых дапамогах. Многія работнікі «КІМа» заклапочаны як сваім лёсам, так і лёсам прадпрыемства, на якім прапрацавалі шмат гадоў. Работніцы, якія прыйшлі на асабісты прыём да старшыні аблвыканкама, падзяліліся набалелым. Да прыкладу, Любоў Лешчова распавяла, што прыйшла на «КІМ» ў 1991 годзе, у апошні час выконвала абавязкі начальніка змены. Разумеючы складанасці, якія перажывае ААТ, паспрабавала пашырыць свае магчымасці для далейшага працаўладкавання — скончыла курсы бухгалтараў. Яна прасіла дапамагчы ёй у пошуках новага працоўнага месца.
Мікалай Мікалаевіч даручыў першаму намесніку старшыні гарвыканкама Валянціну Цветкову заняцца гэтым пытаннем.
Вольга Аўдзеева 15 гадоў адпрацавала ў фірменным гандлі, тры гады ўзначальвала калектыў крамы на Маскоўскім праспекце і на прыёме прадстаўляла не толькі свае, але і інтарэсы падначаленых.
— Усім бы нам хацелася застацца ў трыкатажнай галіне, хацелася б, каб наша прадпрыемства і надалей існавала, бо яго прадукцыя карыстаецца попытам. Але ў цяперашні момант мы занятыя пошукам новых месцаў працы. Тое, што мне асабіста прапанавалі — значна ніжэй за маю кваліфікацыю, — заўважыла яна.
— Ваша пытанне старанна прапрацуюць спецыялісты гарвыканкама і падбяруць варыянты, — запэўніў старшыня аблвыканкама.
У Рэгіны Ткачэнкі чацвёра дзяцей, пражывае яна ў інтэрнаце, па шэрагу прычын, як аб'ектыўных, так і суб'ектыўных, не змагла вырашыць кватэрнае пытанне. Яна папрасіла разгледзець магчымасці аказання яе сям'і матэрыяльнай дапамогі і прадастаўлення сацыяльнага жылля.
В.Цветкоў падрабязна праясніў абставіны, якія раней перашкаджалі вырашэнню кватэрнага пытання. Ён растлумачыў, што гарвыканкам па прынцыпе «аднаго акна» запытае ўсе неабходныя дакументы для таго, каб паставіць яе на чаргу. Але падкрэсліў, што сёлета ў Віцебску не плануецца будаваць сацыяльнае жыллё, так што шматдзетнай сям'і давядзецца пачакаць.
Ніна Алфёранка не згодная з ацэнкай прыватызацыі яе кватэры, бо ў свой час рамонт у атрыманым жыллі яны зрабілі за свой кошт.
Н.Шэрстнёў даручыў праверыць правільнасць ацэнкі кошту прыватызацыі. І падвёў вынікі прыёму па асабістых пытаннях.
— Цяперашні год няпросты. Не заўважаць праблем нельга, як нельга і бяздзейнічаць. Спецыялісты абласнога і гарадскога выканаўчых камітэтаў павінны ставіцца вельмі адказна да падобных зваротаў. Кожны чалавек павінен быць выслуханы, кожны павінен атрымаць адказ аб магчымасцях вырашэння яго пытання. А ўжо затым яго права — прымаць прапанаваныя варыянты або адмаўляцца…
Ларыса ВАЎКОВА, "Віцьбічы"