Старшыня Палаты прадстаўнікоў Уладзімір Андрэйчанка правёў прыём грамадзян у Докшыцкім раёне

Уладзімір Паўлавіч рэгулярна наведвае сваю выбарчую акругу, у якую ўваходзяць Докшыцкі, Глыбоцкі і Ушацкі раёны, сустракаецца з мясцовымі жыхарамі, стараецца дапамагчы кожнаму звернутаму. Асобныя праблемы ўдаецца вырашыць адразу, для вырашэння іншых патрабуецца час.

Так, у снежні мінулага года Уладзімір Андрэйчанка праводзіў прыём грамадзян у Глыбокім. Сярод тых, хто прыйшоў на яго, была жыхарка вёскі Шунеўцы, занепакоеная адсутнасцю міжгародніх аўтобусных зносін паміж Глыбокім і Лагойскам. Па словах жанчыны, раней у Лагойск штодня за'язджалі чатыры аўтобусы, якія накіроўваліся ў сталіцу. Паступова іх колькасць памяншалася, і вось ужо паўгода аўтобусы ідуць у Мінск, пакідаючы ўбаку гэты горад.

Уладзімір Паўлавіч звярнуўся да кіраўніцтва філіяла «Аўтатранспартнае прадпрыемства №16 г. Глыбокае» за садзейнічаннем у вырашэнні пастаўленага пытання. Па словах дырэктара Уладзіміра Пачэпкі, у Віцебскаблаўтатранс перададзены дакументы аб унясенні змяненняў у маршрут аўтобуса, які, верагодна, раз на тыдзень зможа за'язджаць у Лагойск. Праўда, на ўзгадненне сыдзе час, бо гаворка ідзе пра міжвобласны маршрут.

Таксама жыхары Глыбоцкага раёна прасілі не праводзіць рэарганізацыю Шунеўскай і Псуеўскай дзіцячых садкоў – сярэдніх школ. Установы адукацыі захавалі ранейшы статус. Дапамог дэпутат і пчалярам-аматарам, якія сутыкнуліся са складанасцямі ў рэалізацыі прадукцыі, узяў на асаблівы кантроль пытанне, што тычыцца збору сродкаў на рэабілітацыю хворых дзяцей.

Памочнік дэпутата Віталь Шыпко адзначыў, што колькасць зваротаў грамадзян у 2018-м знізілася ў параўнанні з 2017 годам. Пры гэтым усе даручэнні, дадзеныя кіраўніцтву райвыканкама, былі выкананы ў тэрмін. Пастаўленыя пытанні датычыліся рамонту дарог, крэдытавання індывідуальнага будаўніцтва жылля, водазабеспячэння сельскага населенага пункта, рамонту жылога фонду, абскарджання рашэння суда.

Пры садзейнічанні Уладзіміра Андрэйчанкі ў мінулым годзе ў Докшыцах фінансаваўся капітальны рамонт з элементамі мадэрнізацыі паліклінікі ЦРБ на 250 наведванняў у змену і ясляў-сада №1. Ва Ушачах былі накіраваны сродкі на бягучы рамонт і абсталяванне харчаблока цэнтральнай раённай бальніцы, на мадэрнізацыю і капітальны рамонт ясляў-сада №3, рэканструкцыю будынка пад дзіцячую школу мастацтваў.

У Глыбоцкім раёне праводзіліся рэканструкцыя фізкультурна-аздараўленчага цэнтра, капітальны рамонт з мадэрнізацыяй будынка інфекцыйнага корпуса цэнтральнай раённай бальніцы, бягучы рамонт жыллёвага фонду, будаўніцтва водаправода ў вёсцы Харошкі, добраўпарадкаванне прыдамавых тэрыторый. Быў набыты аўтамабіль хуткай дапамогі.

– Добрыя справы з удзелам Уладзіміра Паўлавіча можна яшчэ доўга пералічваць, калі ўспомніць усё тое, што было зроблена за шмат гадоў, – адзначыў Віталь Шыпко. – Ён уважліва ставіцца да просьбаў гараджан і жыхароў глыбінкі, не дзеліць пытанні па ступені важнасці, усё бярэ на кантроль. І той факт, што з кожным годам на прыём прыходзіць усё менш людзей са скаргамі, сведчыць у першую чаргу аб якасна арганізаванай у Глыбоцкім, Докшыцкім, Ушацкім раёнах працы са зваротамі грамадзян. Мясцовыя ўлады дзейнічаюць на апярэджанне, не выпускаючы з-пад увагі надзённыя пытанні жыццезабеспячэння насельніцтва.

"Віцебскія весці". Фота БелТА.