Старшыня Віцебскага аблвыканкама Мікалай Шарснёў правёў прыём грамадзян на Аршанскім мясакамбінаце
Кацярына Антанёненка звярнулася да губернатара з пытаннем выплаты зарплаты ў натуральнай форме. Работнікі Аршанскага мясакансервавага завода цяпер каля 10% зарплаты атрымліваюць прадукцыяй, пры гэтым атоварыцца можна толькі ў крамах адной гандлёвай сеткі. "Наш горад развіваецца. Адкрываюцца новыя крамы, паміж гандлёвымі сеткамі канкурэнцыя. І я рэальна бачу, што гэты ж набор прадуктаў у іншых крамах можна купіць танней. Я зацікаўлена ў эканоміі. У сям'і двое дзяцей, расходаў шмат. Розніцу ў цане я магла б, напрыклад, выдаткаваць на аплату дадатковага гуртка", - патлумачыла Кацярына Антанёненка.
Яна распавяла, што прыемна ўражана ўвагай і непадробнай зацікаўленасцю з боку губернатара да яе пытання. "Адно з рашэнняў праблемы, якое было прапанавана, - зніжкавыя карты для нашых работнікаў. Варыянт, на мой погляд, добры", - сказала жанчына. "А наогул вельмі добра, што любы чалавек можа прыйсці на прыём і расказаць пра тое, што яго хвалюе, пра свае праблемы і клопаты. Важна і тое, што кіраўнікі такога высокага рангу шчыра цікавяцца станам спраў, унікаюць у праблемы, вядуць зацікаўлены дыялог і імкнуцца знайсці рашэнне, якое б усіх задаволіла", - рэзюмавала суразмоўніца.
Акрамя правядзення прыёму грамадзян, губернатар сёння таксама пабываў на вытворчасці і правёў нараду па пытаннях рэалізацыі новых інвестпраектаў і ўдасканалення працы мясакамбіната.