Прыезджыя па бязвізе на "Славянскі базар" змогуць аператыўна зарэгістравацца - УУС

Замежныя госці, якія прыедуць па бязвізавым рэжыме на мерапрыемствы "Славянскага базару ў Віцебску", змогуць аператыўна прайсці рэгістрацыю ў тэрытарыяльных падраздзяленнях па грамадзянстве і міграцыі. Аб гэтым паведаміў сёння начальнік УУС Віцебскага аблвыканкама Міхаіл Грыб на брыфінгу, прысвечаным рабоце праваахоўных органаў у дні форуму.

Чакаецца, што на творчы форум прыедуць каля 300 тыс. чалавек, у тым ліку з блізкага і далёкага замежжа. Міліцыя гатова да прыезду замежнікаў па бязвізе з 1 па 20 ліпеня, адзначыў начальнік УУС. "Падчас фестывалю ва ўсіх РАУС горада будуць дзяжурыць супрацоўнікі тэрытарыяльных падраздзяленняў па грамадзянстве і міграцыі. Тут замежныя грамадзяне і групы гасцей пасля прыезду змогуць аператыўна зарэгістравацца", - адзначыў Міхаіл Грыб.

Па ўсіх пытаннях па бязвізавым уездзе можна звярнуцца ў працоўны час ва ўпраўленне па грамадзянстве і міграцыі УУС па тэлефоне 8 (0212) 60-34-81. З сённяшняга дня асабовы склад органаў унутраных спраў Віцебскага гарнізона і прыданых сіл пачаў працу ва ўзмоцненым варыянце нясення службы. Для забеспячэння бяспекі гасцей і жыхароў горада ў фестывальны час на дапамогу мясцовым праваахоўнікам прыедуць калегі з іншых абласцей краіны. Яны дапамогуць у арганізацыі пропускнага рэжыму ў Летнім амфітэатры, канцэртнай зале "Віцебск", а таксама будуць патруляваць цэнтр горада. Разам з мужчынамі рэгуляваць дарожны рух на цэнтральных перакрыжаваннях горада будуць супрацоўніцы Дзяржаўтаінспекцыі.

Міхаіл Грыб дадаў, што для аператыўнага пропуску гледачоў на мерапрыемства будуць выкарыстоўвацца інтраскопы, якія паказалі сваю эфектыўнасць на II Еўрапейскіх гульнях. Сёлета дадасца колькасць праходаў у чашу амфітэатра, каб працэдура пропуску гледачоў ажыццяўлялася хутчэй. Акрамя таго, будуць асобныя праходы для мам з маленькімі дзецьмі, цяжарных, ветэранаў і інвалідаў.

БЕЛТА.