Прышчэпкі супраць кляшчовага энцэфаліту рэкамендуюць зрабіць віцебскія педыятры дзецям на перыяд летніх канікул

Па словах загадчыцы кабінета імунапрафілактыкі абласнога дзіцячага цэнтра Ірыны Грыбоўскай, дадзеная вакцына з'явілася ў распараджэнні педыятраў гэтай вясной, прызначаецца для дзяцей ва ўзросце ад года да 16 гадоў. Асабліва гэта актуальна для тых, каго бацькі адправяць у загарадныя аздараўленчыя лагеры ці да сваякоў у вёску. Акрамя таго, як паказвае вопыт мінулага лета, з укусамі небяспечных крывасмокаў звярталіся не толькі тыя, хто пабываў у лесе, але і тыя, хто адпачыў у прыгарадзе, дзе мелася нескашаная трава. Таму прышчэпкі супраць кляшчовага энцэфаліту павінны стаць эфектыўным сродкам у прафілактыцы вышэйназванай інфекцыі сярод дзіцячага насельніцтва, выказала надзею Ірына Аляксандраўна.

Дарэчы, прадугледжаны прышчэпкі і для дарослых, прычым не толькі з групы рызыкі, якім яны належаць па эпідэміялагічных паказаннях і робяцца планава, напрыклад, работнікам лесагаспадарчай галіны. Не зашкодзіць вакцынацыя паляўнічым, рыбакам, дачнікам і ў цэлым аматарам вольнага часу на прыродзе.

Актуальнасць пытання падкрэсліваюць і спецыялісты Віцебскага занальнага цэнтра гігіены і эпідэміялогіі. Яны адзначаюць, што каля 70% кляшчоў, якія трапілі на даследаванне ў лабараторыю ў мінулым сезоне, былі заражаны вірусам кляшчовага энцэфаліту. А гэта значыць, што чалавек, які падвергнуўся ўкусу насякомага, павінен у абавязковым парадку прайсці прафілактыку антыбіётыкамі. Інакш яго чакаюць не самыя прыемныя наступствы: найцяжэйшы клінічны стан, працяглае лячэнне і рэабілітацыя пасля перанесенага захворвання. Таму медыкі рэкамендуюць падстрахавацца і прыбегнуць да імунапрафілактыкі.