Праект «Разам працуем, разам спяваем!» прыйшоў у вытворчыя цэхі вядучых аршанскіх прадпрыемстваў

Праект «Разам працуем, разам спяваем!» першымі сустрэлі на фінішным участку механічнага цэха №4 ААТ Станкабудаўнічы завод «Чырвоны бальшавік». Запальнае шоу сярод высокадакладных станкоў прыйшло паглядзець больш за 200 заводчан. Падтрымаць іх пазітыўны настрой прыехалі народны артыст Беларусі Уладзімір Громаў, Заслужаны калектыў Рэспублікі Беларусь фальклорная група «Купалінка». У якасці вядучага – Герман Цітоў.

 

Госцяў прывітаў дэпутат Палаты прадстаўнікоў Нацыянальнага сходу Рэспублікі Беларусь Аляксандр Міхно.

Дырэктар «Чырвонага бальшавіка» Віталь Круцько адзначыў, што такія акцыі, як «Марафон адзінства», надаюць энергію і натхняюць на новыя здзяйсненні.

 

– Тое, што наш завод стаў адной з кропак марафону, сведчыць пра вялікую павагу да галіны машынабудавання і пра каштоўнасць працы нашых работнікаў, – сказаў кіраўнік. – Мы ўдзячныя арганізатарам мерапрыемства за магчымасць расфарбаваць працоўныя будні людзей, паслухаць і пагутарыць з папулярнымі беларускімі выканаўцамі, застаючыся пры гэтым на працоўным месцы. Праект «Разам працуем, разам спяваем!» даказвае, што ў Беларусі цэняць працу кожнага чалавека. Думаю, ён будзе спрыяць яшчэ большаму згуртаванню нашага калектыву аднадумцаў. Мы ганарымся сваёй краінай, паважаем традыцыі і поўныя жадання дзейнічаць і развівацца на карысць роднай Аршаншчыны і Беларусі.

 

Не хаваў эмоцый самы вопытны шліфавальшчык завода Аляксандр Шынкевіч.

– За 52 гады працы на прадпрыемстве такое бачу ўпершыню. У цэху абсталявалі сцэну, паставілі святло. Усё, як на сапраўдным канцэрце. Складана словамі перадаць атмасферу таго, што адбываецца. Гэта – узрушальна! – сказаў ён. – Гутарка з артыстамі, іх выступленне напоўнілі асаблівай энергетыкай. Настрой цудоўны, адчуваю сябе нібы на свяце. Напэўна, такія праекты і ёсць свята, якое дае магчымасць усвядоміць, што мы на многае здольныя разам.

Не ўпершыню выступае ў Оршы Уладзімір Громаў.

- Вось такія цэхавыя канцэрты - узрушальныя, жывыя. Гэта той рэальны сектар эканомікі, які робіць нашу краіну лепшай і прыгажэйшай. Гэта тое, што можна "памацаць", паглядзець. Дзіву даешся, што ў нас ёсць такія людзі, такія вытворчасці.

 

Інжынер па падрыхтоўцы вытворчасці Надзея Цяпова танцавала і спявала разам з артыстамі.

 

– Ідэя вельмі класная! Вельмі душэўна, ярка, крэатыўна! Так у нас яшчэ не запальвалі! Сярод напружанага працоўнага дня гэты канцэрт – сапраўдная аддушына, магчымасць адчуць сябе адной вялікай дружнай сям'ёй, – прызналася дзяўчына. – Мне прыемна стаць часткай такога праекта. Уражанні – самыя лепшыя. Дзякуй арганізатарам свята.

"Віцебскія весці"