Праект будаўніцтва Сафійскага сабора ў Віцебску прадстаўлены грамадскасці для абмеркавання
У дзень святкавання Успення Божай Маці ў Свята-Успенскім кафедральным саборы ў Віцебску адбылася прэзентацыя канцэпцыі будучага храма, каб пазнаёміць людзей з архітэктурнымі задумамі, якія прадугледжваецца рэалізаваць на наступнай стадыі праектавання.
З прапановай узвесці новы храм у абласным цэнтры яшчэ ў 2013 годзе выступіў архіепіскап Віцебскі і Аршанскі Дзімітрый. Архітэктурны праект распрацаваны на падставе замовы рэлігійнай супольнасці "Прыход Сафійскага сабора Віцебска Віцебскай епархіі Беларускай Праваслаўнай царквы". Для новага храма вызначана месца на ўсходнім беразе Заходняй Дзвіны паміж вуліцамі Чэхава і Урыцкага, у парку Партызанскай славы, добраўпарадкаванне якога працягваецца. Выдзяленне гэтага зямельнага ўчастка ўзгоднена з кіраўніком дзяржавы. Усе дазвольныя дакументы аформлены ў адпаведнасці з патрабаваннямі заканадаўства. "Праект значны для горада і краіны, паколькі да гэтага часу стараліся аднаўляць страчанае, але ў працэсе дапускаліся памылкі, іх даводзілася выпраўляць. А гэта новы аб'ект, які стане элементам гонару нашага пакалення, упрыгожыць зону гістарычнага цэнтра", - растлумачыў намеснік галоўнага архітэктара горада Леанід Багданаў.
Знешні выгляд распрацаваны з выкарыстаннем аналагаў - Сафійскіх сабораў у Кіеве, Ноўгарадзе, а мур сцен - з улікам асаблівасцей Полацкай Сафіі XI стагоддзя, гэта значыць па ўзоры сабора ў Канстанцінопалі: з поўнацельнай цэглы з вонкавай абліцоўкай мурам з плінфы і чаргаваннем з бутавым каменем. "Свяцейшы Патрыярх Маскоўскі і ўсяе Русі Кірыл дабраславіў гэты праект, які сведчыць аб вытоках праваслаўя на Белай Русі. Мы хочам адрадзіць для нашчадкаў тую Сафію, якая была ў XI стагоддзі, каб яны маглі ўбачыць, як яна выглядала першапачаткова, да аднаўлення, з рысамі архітэктуры, характэрнай для Візантыі", - адзначыў будучы настаяцель гэтага храма протаіерэй Міхаіл Мартыновіч.
Таксама ён дадаў, што Віцебск, а не Полацк абраны месцам будаўніцтва, паколькі набліжаецца чарговае раздробненне епархій і будзе створана мітраполія на базе ўсёй вобласці, цэнтрам стане Віцебск.
У адказ на заўвагі гараджан, занепакоеных лёсам іншых храмаў, якія планавалася аднавіць у абласным цэнтры, Леанід Багданаў і айцец Міхаіл падкрэслілі, што гэтыя праекты не забыты. Але для іх рэалізацыі пакуль няма фінансавання, альбо перашкаджаюць іншыя складанасці, як у выпадку з аднаўленнем Мікалаеўскага сабора. Будаўніцтва Сафійскага сабора будзе весціся за кошт сродкаў абшчыны, ахвяраванняў прыхаджан, спонсараў і ўсіх неабыякавых. Напрыклад, падчас свайго прыезду ў Віцебск у 2013 годзе кіраўнік "Газпрама" Аляксей Мілер выказаў жаданне стаць ганаровым старшынёй апякунскай рады па аднаўленні храма і гатовы ўдзельнічаць у добрай справе фінансава.
Грамадскае абмеркаванне працягнецца па 18 верасня. На працягу гэтага часу прэзентацыйныя стэнды будучага аб'екта знаходзяцца ў Свята-Успенскім саборы, там жа ўсе жадаючыя могуць пакінуць свае заўвагі і прапановы ў кнізе водгукаў. Акрамя таго, сваё меркаванне гараджане і ўсе неабыякавыя могуць выказваць у пісьмовым выглядзе, адпраўляючы на адрас Віцебскай епархіі і гарвыканкама, на сайце якога размешчана падрабязная інфармацыя аб праекце. Пасля ўсіх узгадненняў на падставе рашэння гарвыканкама пачнецца будаўніцтва.
Кацярына Князева, БЕЛТА.