Праект урбаністычнага форуму "Прастора" рэалізуецца ў Віцебску

Праект урбаністычнага форуму "Прастора" рэалізуецца ў Віцебску для ўцягвання насельніцтва ў арганізацыю гарадскіх прастор на аснове экалагічных прынцыпаў, паведаміла кіраўнік праекта, дырэктар установы "Цэнтр урбаністычных праектаў і ініцыятыў "Прастора" Аксана Кузіна.

"Усё пачыналася з ініцыятывы, перарасло ў праграму, фінальнай кропкай якой стане урбаністычны форум "Прастора". Яго праект ужо апублікаваны на сацыяльнай платформе "Талака", каб прыцягнуць партнёраў і ўдзельнікаў. Таксама для рэалізацыі праекта зарэгістравана культурна-асветніцкая ўстанова "Цэнтр урбаністычных праектаў і ініцыятыў "Прастора".

Будзем усёй талакой адраджаць культуру вольнага часу ў гарадскіх парках, грунтуючыся на прынцыпах экалагічнага мыслення, добраўпарадкоўваць грамадскія тэрыторыі і павышаць турыстычную прывабнасць Віцебска", - апісала задачы праекта Аксана Кузіна. Форум уключае 5 асноўных і спадарожных мерапрыемстваў, аб'яднаных агульнай тэмай "Зялёны квартал", якія пройдуць 21 мая ў фармаце open air. У іх возьмуць удзел актывісты і простыя гараджане, студэнты і маладыя архітэктары, дызайнеры і мастакі, ландшафтныя дызайнеры і ўрбаністы, музыкі і іншыя госці і эксперты. Месцам правядзення абраны парк культуры і адпачынку імя Фрунзе ад моста Тысячагоддзя да моста Баўмана. На асноўных пляцоўках разгорнуцца конкурс-пленэр гарадскога лэнд-арта "Нястомны сад", выстава конкурснага праекта паркавай мэблі "Эка Дызайн" (у выкананне творчых заданняў ужо ўключыліся студэнты 2-4 курсаў мастацка-тэхналагічнага факультэта ВГТУ пад кіраўніцтвам педагогаў-кураторов), адбудуцца рэстаранны дзень "Іншая Ежа" і канцэрт-марафон.

"АгуRock" у падтрымку форуму, выстава-продаж кветак і букетаў "Кветкавая паляна".

На іншых пляцоўках у адкрытым фармаце пройдуць выставы аб'ёмнага тэкстылю і флорыстыкі. Ужо з лютага запрапанавана серыя майстар-класаў, накіраваных на павышэнне кваліфікацыі аўтараў сацыяльна-культурных ініцыятыў па напісанні праектаў і выкарыстанні краўдфандынгавых платформ для іх рэалізацыі. Урбаністычны форум "Прастора" - ініцыятыва некамерцыйная, грамадская, таму Аксана Кузіна запрашае да ўдзелу неабыякавых гараджан і спонсараў - усіх, хто зацікаўлены ў развіцці гарадской прасторы і гатовы зрабіць нешта сапраўды новае і цікавае. Вядуцца перамовы аб партнёрстве з гарадскімі СМІ, турыстычным салонам "Ілва". Ініцыятыва ўжо атрымала падтрымку Віцебскага гарвыканкама, якім падрыхтаваны праект рашэння аб удзеле ў мерапрыемствах форуму.

Кацярына Князева, БЕЛТА.