Прафсаюзны конкурс «Новыя імёны Беларусі-2016» стартуе ў лістападзе

Прафсаюзы працягваюць пошук творчых і крэатыўных людзей.

 Рэспубліканскі конкурс «Новыя імёны Беларусі» стане штогадовым. Такое рашэнне было прынята на VII З'ездзе Федэрацыі прафсаюзаў Беларусі, якая з'яўляецца арганізатарам творчага спаборніцтва. Праўда, яго фармат некалькі зменіцца.

– Конкурс, як і годам раней, праводзіцца для членаў прафсаюзаў – прадстаўнікоў працоўных калектываў, але ўжо без узроставых абмежаванняў, – патлумачыла прэс-сакратар ФПБ па Віцебскай вобласці Алена Усцінава. – У 2016-м спаборніцтва пройдзе пад дэвізам «Ствараючы – тварыць!». Адной з галоўных яго новацый з'яўляецца пашырэнне жанравага напаўнення. У прыватнасці, з'явіцца намінацыя «Выяўленчае і дэкаратыўна-прыкладное мастацтва». У катэгорыі «Сцэнічная творчасць» кожная група (ад 4 да 10 чалавек) можа прыцягнуць толькі аднаго прафесіянала з профільнай адукацыяй у сферы культуры. Таксама ў нумарах могуць удзельнічаць члены сем'яў самадзейных артыстаў.

Конкурс «Новыя імёны Беларусі-2016» разбіты на чатыры этапы. У лістападзе ён стартуе ў працоўных калектывах краіны. Раённы (гарадскі) тур пройдзе ў снежні-студзені, абласны – у лютым-сакавіку. Фінал, куды трапяць самыя таленавітыя і крэатыўныя, адбудзецца ў красавіку-маі 2016 года. Імёны пераможцаў стануць вядомыя 1 Мая, у Свята працы.

Алена Пятрова, «Віцебскія весці».