Праграма развіцця бібліятэчнай справы будзе распрацавана ў Віцебскай вобласці

24 сакавіка, Віцебск /Дзіяна Курыла - БЕЛТА/. Праграма развіцця бібліятэчнай справы будзе рэалізавана ў Віцебскай вобласці. Старшыня Віцебскага аблвыканкама Аляксандр Косінец даручыў распрацаваць яе праект упраўленню культуры аблвыканкама сёння пры наведванні абласной бібліятэкі імя Леніна, перадае карэспандэнт БЕЛТА. У праект праграмы будуць уключаны мерапрыемствы, накіраваныя на паляпшэнне матэрыяльна-тэхнічнай базы, павелічэнне фондаў бібліятэк, камп'ютарызацыю і стварэнне электронных бібліятэк. У прыватнасці, прадугледжваецца правесці рэканструкцыю існуючага будынка абласной бібліятэкі, ператварыўшы яе ў далейшым у гарадскую. Для абласной бібліятэкі неабходна пабудаваць новы сучасны будынак. Па папярэдніх разліках, плошча новай абласной бібліятэкі будзе каля 15-20 тыс. кв.м. Яе фонд складзе амаль 4 млн кніг. Пры гэтым праекціроўшчыкам трэба будзе ўлічыць сучасныя тэндэнцыі ў развіцці бібліятэчнай справы, калі бібліятэкі становяцца грамадска-культурнымі цэнтрамі, аснашчанымі па самых перадавых тэхналогіях. Старшыня аблвыканкама даручыў да 1 верасня выбраць пляцоўку пад новы будынак і распрацаваць праект. У Віцебскай вобласці працуюць 620 публічных бібліятэк. Кніжны фонд налічвае 8,5 млн кніг. Чытачамі бібліятэк з'яўляюцца 600 тыс. жыхароў вобласці. Віцебская абласная бібліятэка імя Леніна створана 80 гадоў таму. Яе фонд складае каля 700 тыс. кніг. З 55 тыс. чытачоў абласной бібліятэкі 46% студэнты.-0-