Нямецкі інвестар плануе запусціць вытворчасць вырабаў з бетону ў Віцебску

Пра гэта стала вядома па выніках аўкцыёну ў камітэце «Віцебскаблмаёмасць». На таргі была выстаўлена былая вытворчая база на вул. С. Панковай у абласным цэнтры. Яна не выкарыстоўваецца з ліпеня 2019 года пасля таго, як ДКПУП «Спецыялізаванае рамонтна-будаўнічае ўпраўленне г. Віцебска» было прызнана банкрутам і ліквідавана. У склад лота ўключаны два збудаванні агульнай плошчай больш за 740 кв. м (адно з іх — крыты бетонна-змяшальны вузел), прадавалася таксама права арэнды зямельнага ўчастка 0,4 га на 25 гадоў. Аб'ект прыцягнуў аднаго пакупніка, які выклаў за нерухомасць больш за 172,2 тыс. рублёў.

Новы ўласнік разлічвае пасунуць канкурэнтаў і заняць долю рынку перш за ўсё за кошт якасці. Яго забяспечыць высокакласнае абсталяванне, аналагаў якому няма як мінімум у вобласці.

Па словах яго прадстаўніка Вадзіма Шапрунова, новы ўласнік у тандэме з нямецкім інвестарам мае намер вярнуць да жыцця праблемны актыў. Там плануецца ўсталяваць аўтаматызаваную лінію па выпуску тратуарнай пліткі, бардзюраў, элементаў добраўпарадкавання, будаўнічых блокаў і іншай бетоннай прадукцыі. Абсталяванне са Швецыі 2019 года выпуску з начынкай ад нямецкіх кампаній разлічана на вытворчасць 650 кв. м вырабаў у змену. Нямецкі партнёр гатовы таксама закупіць і забяспечыць мантаж абсталявання, прадаставіць спецыялізаваны транспарт. Першапачаткова прадугледжваецца стварыць каля 20 працоўных месцаў, навучанне персаналу таксама возьме на сябе замежны ўдзельнік праекта.

Рэалізаваць планы партнёры гатовыя ў бягучым годзе, вядома, пры ўмове аднаўлення дзелавой актыўнасці пасля пандэміі.