Пракуратура Віцебскай вобласці для абароны суб'ектаў гаспадарання ў 2012 годзе накіравала больш за 300 іскаў

Пракуратура Віцебскай вобласці для абароны эканамічных інтарэсаў суб'ектаў гаспадарання накіравала за мінулы год у гаспадарчыя суды рэспублікі больш за 300 іскаў, паведаміла карэспандэнту БЕЛТА намеснік начальніка аддзела па наглядзе за выкананнем заканадаўства і законнасцю прававых актаў пракуратуры Віцебскай вобласці Вольга Лапкоўская.

Усяго ў 2012 годзе пракурорамі, якія ажыццяўляюць нагляд за выкананнем заканадаўства на тэрыторыі Віцебскай вобласці, у гаспадарчыя суды рэспублікі прад'яўлена 311 іскаў і заяў аб узбуджэнні загаднага вядзення на агульную суму больш за Br39,5 млрд., $72,3 тыс. і 4,6 млн. расійскіх рублёў.

Найбольшая колькасць зваротаў за судовай абаронай ажыццяўлялася ў абарону інтарэсаў дзяржаўных суб'ектаў гаспадарання - 69 іскаў і 65 заяў у парадку загаднага вядзення на агульную суму больш за Br19 млрд. У інтарэсах арганізацый аграпрамысловага комплексу прад'яўлена 22 іскі, памер іскавых патрабаванняў па якіх склаў Br6,3 млрд.

"Адначасова з гэтым пракурорамі аказваецца дапамога і прадпрыемствам недзяржаўнай формы ўласнасці. У іх карысць у мінулым годзе прад'яўлена 23 іскі на агульную суму каля Br2,1 млрд.", - адзначыла Вольга Лапкоўская, дадаўшы, што, як правіла, у органы пракуратуры за абаронай парушаных маёмасных правоў звяртаюцца акцыянерныя таварыствы з пераважнай доляй дзяржаўнай уласнасці ва ўстаўным фондзе.

Найбольш актыўна ажыццяўлялі абарону інтарэсаў суб'ектаў гаспадарання шляхам звароту ў Гаспадарчы суд пракуроры Кастрычніцкага і Чыгуначнага раёнаў Віцебска, Оршы, Віцебскага раёна.

Мэтавая праца па абароне інтарэсаў дзяржавы і арганізацый шляхам прад'яўлення іскаў і заяў у гаспадарчыя суды рэспублікі будзе працягнута органамі пракуратуры і ў далейшым, падкрэсліла Вольга Лапкоўская.