Праца па развіцці Аршанскага раёна павінна весціся больш высокімі тэмпамі - Наталля Качанава
"Кіраўнікам розных органаў улады не варта спадзявацца адзін на аднаго. Кожны павінен у поўнай меры усвядоміць ступень сваёй адказнасці", - падкрэсліла Наталля Качанава. У сувязі з гэтым яна прапанавала праз месяц зноў прааналізаваць вынікі працы, "за гэты час павінны быць сур'ёзныя зрухі".
Па словах кіраўніка Адміністрацыі Прэзідэнта, у верасні адбудзецца вялікая нарада па развіцці гарадоў з насельніцтвам звыш 80 тыс. чалавек. Першым справаздачу аб тым, як рэалізуецца праграма па развіцці раёна і вырашаюцца пастаўленыя задачы, будзе трымаць старшыня Аршанскага райвыканкама. "Таму што па Аршанскім раёне прыняты такія меры падтрымкі і праграма, якіх няма ні ў якіх іншых рэгіёнах. На яго прыкладзе мы хочам паказаць, як працуюць гэтыя прэферэнцыі. Аднак на сённяшні дзень няма чаго паказаць, што служыла б яркім прыкладам для іншых гарадоў. Чаканы вынік пакуль не дасягнуты, тэмп асваення інвестыцый нязначны", - сказала Наталля Качанава. Яна заклікала кіраўнікоў усіх узроўняў прыкласці максімальныя намаганні ў вырашэнні пастаўленых задач і падкрэсліла, што даручэнні, пастаўленыя кіраўніком дзяржавы ў сельскай гаспадарцы, па нарыхтоўцы кармоў, сіласным траншэях, навядзенні парадку на зямлі, прамысловым комплексе і іншых сферах, павінны быць выкананы ў поўным аб'ёме. Нароўні з гэтым кіраўнік Адміністрацыі Прэзідэнта адзначыла, што некаторыя зрухі па добраўпарадкаванні, павелічэнні прыбытку, іншых напрамках ужо заўважныя. "Але прынятыя подпраграмы павінны рэалізоўвацца больш хуткімі тэмпамі. Чамусьці яшчэ ідзе некаторая раскачка. Гэта недапушчальна, валакіты ў такіх пытаннях быць не павінна. На мой погляд, гэта проста недапрацоўкі кіраўнікоў альбо, калі гэта камунальныя прадпрыемствы, - мясцовых органаў улады, калі рэспубліканскія - то
республиканскіх. Што тычыцца апошніх, то мы трымаем на кантролі ўсе праекты, але, на жаль, тэмпы рэалізацыі не задавальняюць", - канстатавала Наталля Качанава.Асобную ўвагу ўдзельнікі пасяджэння завострылі на пытанні адтоку кадраў. Арганізацыямі Аршанскага раёна ў студзені-маі працаўладкавана на 584 чалавекі менш, чым звольнена. "З людзьмі трэба працаваць. Калі ў іх будзе дастойная заработная плата, умовы працы і адпаведныя адносіны, то ніхто з'язджаць не будзе. У нас шмат добрых прыкладаў, у тым ліку па моладзі, якая зацікаўлена ў працы, калі ў яе ёсць жыллё і камфортныя ўмовы жыцця. Але гэтым пытаннем трэба займацца", - сказала кіраўнік Адміністрацыі Прэзідэнта.
Сваю ацэнку рэалізацыі ўказа №506 "Аб развіцці Аршанскага раёна Віцебскай вобласці" за мінулы перыяд даў кіраўнік справамі Прэзідэнта Віктар Шэйман. "Арганізацыямі раёна за студзень-красавік атрымана Br26,9 млн чыстага прыбытку. Рэнтабельнасць продажаў склалася на ўзроўні 6,8%. Разам з тым казаць аб эфектыўнасці эканамічнага росту заўчасна. Адмоўную рэнтабельнасць у прамысловасці мае кожнае чацвёртае прадпрыемства, у сельскай гаспадарцы - кожнае другое. Узрасла колькасць стратных арганізацый", - канстатаваў Віктар Шэйман.