Праца настаўніка павінна быць накіравана на падрыхтоўку дзяцей да жыцця
Такое меркаванне выказаў начальнік упраўлення адукацыі Віцебскага аблвыканкама Іван Шчурок перад пачаткам абласной жнівеньскай педагагічнай канферэнцыі.
"Настаўніку варта наладзіцца на выніковую працу і разумець, што яго дзейнасць павінна мець аддачу. Гэтая дзейнасць павінна быць накіравана на падрыхтоўку дзяцей да жыцця. Я не кажу - на паступленне выключна ў вышэйшыя навучальныя ўстановы, зараз на першы план стаўлю атрыманне рабочай прафесіі", - сказаў Іван Шчурок.
Ён падкрэсліў, што ў школе фарміруюцца асноўныя асобасныя якасці, і шмат у чым ад настаўніка залежыць, якім вырасце чалавек. "Мне вельмі пашанцавала ў жыцці, што я выбраў менавіта гэту прафесію, і з 1974 года працую ў сістэме адукацыі", - падкрэсліў начальнік упраўлення.
Гаворачы аб падрыхтоўцы да новага навучальнага года, ён адзначыў, што прыёмка школ гэтым летам вялася як ніколі скрупулёзна. "Працавалі камісіі ва ўсіх рэгіёнах. Першапачаткова было зроблена 75 заўваг па ўсіх установах, 10 устаноў адукацыі не было прынята. Недапрацоўкі ўстараняюцца, і зараз усе навучальныя ўстановы прыняты. Мы наладжаны выразна і арганізавана пачаць новы навучальны год", - канстатаваў суразмоўца.
Закранаючы профільнае навучанне, Іван Шчурок падкрэсліў, што рэгіён меў добрыя напрацоўкі. "У нас 7 гадоў таму больш за 81% устаноў адукацыі працавалі па профілях. Напярэдадні новага навучальнага года мы правялі гутарку з педагогамі, з кіраўніцтвам аддзелаў адукацыі, з дырэктарамі школ па арганізацыі профільнага навучання. Плануецца, што ў профільных класах будзе навучацца каля 74% старэйшакласнікаў. Але самае галоўнае не колькасць, а змест працы", - сказаў начальнік упраўлення.
На абласной педагагічнай канферэнцыі, у якой узялі ўдзел першы намеснік міністра адукацыі Вадзім Богуш і намеснік старшыні аблвыканкама Уладзімір Церанцьеў, абмяркоўваліся стратэгічныя напрамкі развіцця сістэмы адукацыі рэгіёна.
Алена Ціханава, БЕЛТА.