Пашыранае пасяджэнне прэзідыума Віцебскай абласной арганізацыі Беларускага таварыства Чырвонага Крыжа было прысвечана вынікам дзейнасці за 2019 год
– Віцебская абласная арганізацыя з'яўляецца лідарам у краіне, у прыватнасці, у сферы прадастаўлення медыка-сацыяльнай дапамогі пажылым грамадзянам, – адзначыла генеральны сакратар БТЧК Вольга Мычко, і стане пляцоўкай для рэалізацыі праекта Еўрасаюза «Стратэгія актыўнага даўгалецця». Ужо рэалізуюцца праекты па аказанні дапамогі людзям з ВІЧ-інфекцыяй і туберкулёзам, асобам, якія маюць патрэбу ў сацыялізацыі.
Усе гэтыя напрамкі дзейнасці старшыня абласной арганізацыі БТЧК Галіна Жаланава ў сваім выступленні вылучыла як асноўныя. Яна адзначыла, што арганізацыя развівае валанцёрскі рух сярод падлеткаў і моладзі 14–20 гадоў у рамках рэалізацыі праекта па прафілактыцы ВІЧ/СНІДу «Роўны навучае роўнага». У барацьбе з туберкулёзам прадстаўнікі Чырвонага Крыжа дзейнічаюць сумесна з абласным супрацьтуберкулёзным дыспансерам і Багушэўскай абласной туберкулёзнай бальніцай. Пры выкананні пацыентамі графіка прыёму лекаў на іх пластыкавыя карты залічваецца 35 рублёў у месяц на праезд да месца лячэння. 26 хворых, якія пражываюць у сельскай мясцовасці, атрымалі фінансавую падтрымку ад Чырвонага Крыжа ў памеры 2000 рублёў. 29 пацыентаў, якія праходзілі лячэнне пад прамым відэаназіраннем, атрымалі смартфоны. 49 пацыентам валанцёры Чырвонага Крыжа аказваюць псіхасацыяльную падтрымку.
Яна таксама падкрэсліла, што ў мінулым годзе было рэалізавана 12 дагавораў на аказанне медыка-сацыяльных паслуг самотным і самотна пражываючым пажылым грамадзянам і інвалідам, якія страцілі здольнасць да самаабслугоўвання. На гэтыя мэты з бюджэту вобласці было выдзелена 97 979 рублёў. 200 чалавек атрымалі неабходную дапамогу на даму, палова з іх – інваліды і ўдзельнікі Вялікай Айчыннай вайны, а таксама хворыя на рак. У якасці сясцёр міласэрнасці працавалі 70 валанцёраў. Акрамя таго, платных паслуг медыка-сацыяльнай дапамогі на даму было аказана на суму больш за 8 000 рублёў. Вядзецца праца па прасоўванні актыўнага даўгалецця і здаровага ладу жыцця сярод пажылых людзей. Так, у аграгарадку Ноўка працуюць «Школа здаровага старэння», фізкультурна-спартыўны клуб «Ураджай».
Чырвоны Крыж сумесна з галоўным упраўленнем па ахове здароўя аблвыканкама, абласным клінічным дзіцячым цэнтрам і абласным клінічным цэнтрам псіхіятрыі і наркалогіі рэалізавалі ініцыятыву па прафілактыцы дзіцячага траўматызму. У выніку колькасць выпадкаў смяротнасці дзяцей, якія адносяцца да групы сацыяльнага рызыкі, знізілася на 21,7 працэнта.
Абласная арганізацыя Чырвонага Крыжа ўдзельнічае таксама ва ўкараненні сістэмы навучання дзяцей і дарослых метадам аказання першай дапамогі. Толькі за мінулы год прайшлі навучанне прадстаўнікі 32 школ і гімназій Віцебска. На выніковых спаборніцтвах у красавіку 2019 года ў парку імя Савецкай Арміі ўзнагародзілі тры лепшыя каманды – сярэдніх школ №№ 31, 6 і гімназіі № 8, а ў маі пераможцы прадставілі Віцебск на міжнародным турніры па першай дапамозе ў Даўгаўпілсе.
Памочнікамі Чырвонага Крыжа з'яўляюцца больш за 3700 валанцёраў. Некаторыя з іх прайшлі навучанне ва Універсітэце грамадзянскай абароны МНС Беларусі. З іх дапамогай былі арганізаваны пункты абагрэву падчас моцных маразоў у студзені 2019 года, раздача пітной вады ў летнія спякотныя дні. Валанцёры ўдзельнічалі ў мерапрыемствах па пошуку зніклых людзей.
Вялікі пласт працы Чырвонага Крыжа – дапамога пацярпелым ад гандлю людзьмі (сумесна з абласной пракуратурай), а таксама дапамога бежанцам і асобам, якія шукаюць прытулку ў Беларусі. Летась такім грамадзянам прадастаўлена штомесячная дапамога на суму 31 270 рублёў, прадастаўлены медыкаменты, школьныя гранты, сродкі на аплату арэнднага жылля, праезду. Нелегальныя мігранты таксама ў полі зроку супрацоўнікаў Чырвонага Крыжа – сярод іх былі грамадзяне Азербайджана, Арменіі, В'етнама, Індыі, Ізраіля, Кубы. Ім былі закуплены прадукты, адзенне і абутак, гігіенічныя наборы на суму больш за 3 000 рублёў, а таксама прадастаўлена магчымасць патэлефанаваць на радзіму.
Паміж Віцебскай абласной арганізацыяй Чырвонага Крыжа, Вісагінскім аддзяленнем Літоўскага Чырвонага Крыжа і раённым аддзяленнем горада Хедмарка Нарвежскага Чырвонага Крыжа падпісана пагадненне аб трохбаковым супрацоўніцтве.
– Мы супрацоўнічаем ужо 11 гадоў, апошнія пяць гадоў да нас далучыўся Нарвежскі Чырвоны Крыж, – расказала прадстаўніца Літоўскага Чырвонага Крыжа Марыя Коркут. – За гэты час зрабілі вельмі многае па падрыхтоўцы службы рэагавання на НС, сястрынскім доглядзе, рабоце з моладдзю. Мы маем магчымасць дзяліцца вопытам, праводзім семінары і трэнінгі на тэрыторыі Беларусі, Нарвегіі і Літвы. Сёлета наш бок плануе зрабіць акцэнт на навучанне аказанню першай дапамогі, якой па нашай методыцы навучаюць дзяцей з пяцігадовага ўзросту і дарослых. Плануецца рэалізацыя і іншых новых супольных праектаў.
У фінале пасяджэння прайшло ўзнагароджанне лепшых супрацоўнікаў, валанцёраў і партнёраў абласной арганізацыі Чырвонага Крыжа.