Развіццё эканамічных сувязяў стане прыярытэтам у супрацоўніцтве Віцебскай і Пскоўскай абласцей

15 мая, Віцебск /Дыяна Курыло - БЕЛТА/. Развіццё гандлёва-эканамічных сувязей павінна стаць прыярытэтам у супрацоўніцтве Віцебскай і Пскоўскай абласцей, заявіў старшыня Віцебскага аблвыканкама Аляксандр Косінец сёння на сустрэчы з губернатарам Пскоўскай вобласці Расійскай Федэрацыі Андрэем Турчаком, перадае карэспандэнт БЕЛТА.

Эканамічны патэнцыял сумежных рэгіёнаў Беларусі і Расіі спрыяе наладжванню ўзаемавыгадных кантактаў, аднак існуючы таваразварот застаецца нізкім, адзначыў Аляксандр Косінец. Старшыня Віцебскага аблвыканкама прапанаваў свайму калегу разгледзець магчымасць стварэння гандлёвых дамоў у Віцебску і Пскове, сумесNых прадпрыемстваў па вытворчасці будматэрыялаў і металаапрацоўцы. Развіццё турыстычнай індустрыі таксама можа быць узаемавыгадным.

Па выніках сустрэчы дасягнута дамоўленасць аб стварэнні рабочай групы па падрыхтоўцы пагаднення аб супрацоўніцтве паміж Віцебскай і Пскоўскай абласцями. Па словах губернатара Пскоўскай вобласці, асаблівая ўвага пры распрацоўцы дакумента будзе ўдзелена эканамічнаму супрацоўніцтву. Як мяркуе Андрэй Турчак, дакумент можа быць падпісаны ўжо ў ліпені.

Дэлегацыя Пскоўскай вобласці на чале з губернатарам Андрэем Турчаком сёння наведвае Віцебскую вобласць. Пасля абмеркавання пытанняў памежнага супрацоўніцтва госці пабывалі ў аграгарадку Ноўка, пазнаёміліся з працай сельскагаспадарчага акцыянернага таварыства "Рудакова".

У студзені-сакавіку бягучага года тавараабарот паміж Віцебскай і Пскоўскай абласцямі склаў $2,5 млн. У параўнанні з аналагічным перыядам 2008 года ён скараціўся на 20%.-0-