Развіццё эканомікі залежыць ад росту аб'ёмаў вытворчасці канкурэнтаздольнай прадукцыі - Косінец
Развіццё эканомікі шмат у чым залежыць ад росту аб'ёмаў вытворчасці канкурэнтаздольнай на рынках прадукцыі. Такі пункт гледжання, адказваючы на пытанне карэспандэнта БЕЛТА, выказаў сёння журналістам старшыня Віцебскага аблвыканкама Аляксандр Косінец.
"Не будзе аб'ёмаў і ліквіднай прадукцыі - не будзе той дабаўленай вартасці, якая дала б магчымасць фарміраваць бюджэт, годна жыць і развіваць эканоміку", - падкрэсліў губернатар. Віцебская вобласць сёння лідзіруе па тэмпах росту валавога рэгіянальнага прадукту ў краіне. За студзень-кастрычнік заданне ўрада перавыканана: тэмп росту склаў больш за 110%. Па словах Аляксандра Косінца, гэтыя паказчыкі маглі б быць вышэй, але ў верасні-кастрычніку ў ААТ "Нафтан" праводзіліся планавыя рамонтныя работы, што не дазволіла прадпрыемству працаваць на поўную магутнасць. Цяпер гэтыя работы завершаны. Значныя рэзервы павелічэння валавога рэгіянальнага прадукту старшыня аблвыканкама бачыць у аграпрамысловым комплексе, у будаўніцтве, гандлі, сферы паслуг, што дазволіць вобласці да канца бягучага года давесці тэмп росту да 112-113%.
У рэгіёне праводзіцца мэтанакіраваная праца па зніжэнні складскіх запасаў. На сёння яны складаюць 27-31%, што з'яўляецца мінімальным паказчыкам па краіне. Прадукцыйнасць працы апярэджвае заработную плату на 7-8%. Аднак Аляксандр Косінец упэўнены, што прадукцыйнасць працы павінна быць яшчэ вышэй.
Прагнозныя паказчыкі па экспарце прадукцыі ў студзені-кастрычніку вобласцю перавыкананы шмат у чым дзякуючы працы прадпрыемстваў камунальнай формы ўласнасці. Пры ўстаноўленым заданні ўрада ў $290 млн. экспарт ужо дасягнуў $1,5 млрд. "Гэта сур'ёзны ўклад для папаўнення золатавалютных запасаў краіны", - канстатаваў Аляксандр Косінец.
Разам з тым са ўступленнем Расіі ў САT абвастрыцца сітуацыя на гэтым рынку. Таму сваёй галоўнай задачай мясцовыя ўлады лічаць падтрымку вытворцаў, якія выпускаюць інавацыйны, запатрабаваны на знешнім рынку прадукт.
Дзіяна Курыла - БЕЛТА