Рэабілітацыйны цэнтр для воінаў-інтэрнацыяналістаў у Віцебску вярнуўся да звычайнага графіку працы
Ён — адзіны ў краіне. З асаблівай спецыфікай. Вось ужо чвэрць стагоддзя Віцебскі абласны клінічны цэнтр медыцынскай рэабілітацыі для інвалідаў і ветэранаў баявых дзеянняў на тэрыторыі іншых дзяржаў займаецца аднаўленнем здароўя ўчарашніх салдат і афіцэраў, а таксама членаў іх сем'яў. Сюды прыязджаюць пацыенты з усіх куткоў Беларусі. Цяпер, падчас пандэміі, ён таксама не застаецца ўбаку.
На прыёме — ветэран афганскай вайны Мікалай Куклін.
— У перыяды абвастрэння эпідэміялагічнай сітуацыі мы, як і іншыя лячэбныя ўстановы вобласці, перапрафілюем стацыянар пад прыём хворых з каранавірусам, — распавядае галоўны ўрач цэнтра Уладзіслаў Мужычэнка. — Падчас гэтай хвалі лячылі ковід-пнеўманіі з 10 верасня па 22 лістапада: на базе цэнтра было разгорнута 90 ложкаў, у тым ліку — 30 кіслародных кропак.
Уладзіслаў Анатольевіч адзначае: працавалі ў цеснай сувязі з інфекцыяністамі і рэаніматолагамі ВДМУ. Гэта ўжо адпрацаваная сістэма — нічога незвычайнага. Перад тым як зноў заняць сваё месца на перадавой (з папярэдняй мабілізацыі прайшло каля паўгода), у цэнтры арганізавалі семінары. Медперсанал азнаёмілі з абноўленымі пратаколамі лячэння, яшчэ раз адпрацавалі навыкі дакладнага выканання санэпідрэжыму ў чырвонай зоне, правялі зручнае для ўсіх размяжаванне патокаў.
— Спецыялісты з універсітэта, вядучыя інфекцыяністы вобласці пастаянна былі з намі на сувязі, кансультавалі, разам праводзілі ўрачэбныя абыходы, — знаёміць кіраўнік з метадамі аператыўнага ўзаемадзеяння. — У нас у штаце 12 урачоў: рэабілітолагі, фізіятэрапеўты, неўролагі, псіхолагі... Але за мінулыя два гады кожны з іх паралельна стаў яшчэ і інфекцыяністам-пульманолагам, так што чацвёртую хвалю каранавіруса сустрэлі ў поўнай баявой гатоўнасці. Добра, што ёсць пастаянна абнаўляемыя эфектыўныя рэкамендацыі Мінздара, адпаведныя пратаколы лячэння, дастаткова сродкаў абароны і медыкаментаў.
Цяпер тут аднаўляюць здароўе ветэраны і члены іх сем'яў.
Супрацоўнікі рэабілітацыйнага цэнтра ўсяго два дні таму выпісалі апошняга хворага, які перанёс пнеўманію, а цяпер ужо актыўна прымаюць на лячэнне ветэранаў баявых дзеянняў. Вядома ж, зваротнаму перапрафіляванню папярэднічала маштабная дэзінфекцыя памяшканняў — яе правялі спецыялісты санэпідслужбы.
Загадчыца аддзялення Ірына Крывашэй падлічвае:
— Ужо за першыя тры гадзіны працы ў звычайным графіку мы ўзялі на рэабілітацыю па накіраваннях раённых паліклінік каля 30 чалавек. Едуць не толькі з Віцебскай вобласці, але і з Мінска, Гомеля і іншых рэгіёнаў. За пару дзён запоўнім усе 100 месцаў.
Пакуль адных афармляюць у рэгістратуры, іншыя ўжо наведваюць працэдурныя кабінеты.
Мікалай Куклін прыехаў з Наваполацка — яго 14-дзённае знаходжанне ў рэабілітацыйным цэнтры распісана па гадзінах. Лекі, ін'екцыі, масажы, фізіятэрапеўтычнае лячэнне, бальнеатэрапія.
Уладзіслаў Мужычэнка і Ірына Крывашэй.
— У Афганістане правёў два гады, служыў ваенным саветнікам аднаго з палкоў, — распавядае ветэран. — Быў паранены. Тут, у цэнтры, лячуся ўжо чацвёрты раз. Раней прыязджаў з жонкай, але цяпер жонкі, на жаль, няма ў жывых... Дзякуй мясцовым урачам: і стаўленне, і лячэнне цудоўнае. Праўда, давялося некалькі месяцаў пачакаць планавай шпіталізацыі, але я цудоўна разумею — час такі складаны.
Літаральна праз месяц у рэабілітацыйным цэнтры, які штогод прымае на лячэнне звыш 2500 чалавек, справяць наваселле — будзе здадзены ў эксплуатацыю яшчэ адзін корпус. А гэта — плюс 70 месцаў для тых, каму сёння не абысціся без дапамогі медыкаў.