Рэгіянальны свята-конкурс "Лялечны свет" збярэ ў Сенна 13 лялечных тэатраў Віцебскай вобласці

Трынаццаць лялечных тэатраў Віцебскай вобласці прымуць удзел у абласным свяце-конкурсе аматарскіх калектываў "Лялечны свет", які адбудзецца ў Сянне 4 лістапада. Пра гэта карэспандэнту БЕЛТА паведамілі ў Віцебскім абласным метадычным цэнтры народнай творчасці.

Стартуе свята ў Сенненскім раённым Доме культуры выставай дзіцячых цацак і малюнкаў. "Сянно ператворыцца ў дзіцячую казачную краіну, у якой з раніцы да самага вечара будуць ісці спектаклі лялечных тэатраў вобласці. Многія з іх носяць ганаровыя званні "узорны", "народны" аматарскі калектыў. Гледачы сустрэнуцца з героямі пастановак "Дзюймовачка", "Емяліна шчасце", "Лялькі анлайн", "Тэрамок на новы лад", убачаць прадстаўленні "байтлейкі" - традыцыйнага беларускага народнага лялечнага тэатра", - распавялі ў метадычным цэнтры, падкрэсліўшы, што гледачам не давядзецца сумаваць і ў перапынках паміж спектаклямі: 9 творчых калектываў прымуць удзел у конкурсе дзіцячых гульнявых праграм "Гульневая вяселка".

Акрамя гэтага, ужо другі раз падчас абласнога свята пройдзе дабрачынная акцыя "Лялечны свет" - дзецям", падчас якой удзельнікі свята парадуюць падарункамі дзяцей з шматдзетных і малазабяспечаных сем'яў, а таксама выхаванцаў дзіцячых дамоў.

Пасля прагляду конкурсных паказаў кампетэнтнае журы падвядзе вынікі і ўручыць лепшым аматарскім лялечным тэатрам вобласці, а таксама пераможцам конкурсу дзіцячых гульнявых праграм дыпломы і прызы.

Алена Ціханава