Падземны пераход на скрыжаванні Маскоўскага праспекта з вуліцамі Церашковай і П. Броўкі ў Віцебску, дзе актыўна вядуцца работы па яго рэканструкцыі, плануецца аснасціць чатырма электрычнымі пад'ёмнікамі для грамадзян з абмежаванымі магчымасцямі. Гэта будзе першае падобнае збудаванне ў абласным цэнтры.

Дэмантажныя работы на аб'екце пачаліся ў канцы снежня мінулага года. З галерэі пераходу па ўсім перыметры зняты абліцовачны матэрыял, падняты стары асфальт. Цяпер спецыялісты ўзяліся за электрычную сістэму і падрыхтоўку паверхняў да атынкавання.

Праектам прадугледжана выкананне унутранай гідраізаляцыі. Уваходы ў падземны пераход будуць выкананы ў выглядзе лесвіц з пакрыццём з тэрмаўстойлівага бетону, сцены – з абліцовачнага граніту, навісі – са зборных металаканструкцый. Пераўтвораны тунэль пададной з самых ажыўленых транспартных артэрый паўночнай сталіцы будзе абсталяваны 16 камерамі відэаназірання, што дапаможа забяспечыць бяспеку грамадзян. Больш таго, дызайн аб'екта будзе дубляваць наяўны на плошчы Перамогі.

– Работы ў падземным пераходзе не спыняюцца нават уночы. Гідрамолат задзейнічаны пастаянна – збівае старыя бетонныя асновы, а самазвалы і пагрузчыкі вывозяць другасную сыравіну, – распавядае прараб Мікалай Яшын. – У цэлым на рэканструкцыі заняты 4 брыгады, у першую змену працуюць 32 чалавекі, а ў другую – 12.

Вялікая пераробка закранула наземнае рух транспарту. Тут часова ўстаноўлены дадатковыя святлафоры і зроблены драўляныя дарожкі. Скарэкціраваны і прыпыначныя пункты трамвая.

На рэканструкцыю выдзелена 10 млрд з гарадскога бюджэту. Плануецца, што рух у абноўленым падземным пераходзе пачнецца ўжо ў ліпені гэтага года, калі аб'ект будзе гатовы да эксплуатацыі. Генеральным падрадчыкам выступае ТАА «ПлісаСтрой», заказчыкам – ДКУП «Упраўленне капітальнага будаўніцтва горада Віцебска».

За тры дзясяткі гадоў існавання пераход рамантавалі толькі касметычна. Ямы і выбоіны, што з'явіліся з часам, усё часцей адбівалі жаданне ў пешаходаў ім скарыстацца. Неаднаразова ад жыхароў абласнога цэнтра паступалі званкі ў гарвыканкам з пытаннем аб мадэрнізацыі збудавання.

– Пераход уваходзіць у праект, распрацаваны УП «Віцебск­грамадзянпраект» – «Інжынерна-транспартная інфраструктура жылога раёна Білева. Рэканструкцыя Маскоўскага праспекта» (1-я чарга будаўніцтва). Да таго ж ён уключае ў сябе мантаж апор пад прыладу кантактнай сеткі. У другой частцы прадугледжана будаўніцтва тралейбуснай сеткі, якая працягнецца да самай кальцавой, а таксама вылучэнне цягавай падстанцыі, – адзначыў галоўны інжынер ДКУП «Упраўленне капітальнага будаўніцтва горада Віцебска» Сяргей Польскі, дадаўшы, што праект закране яшчэ і пашырэнне праезнай часткі да трох палос у напрамку да заапарка.

Заторы на скрыжаванні Маскоўскага праспекта з вуліцамі Церашковай і П. Броўкі сталі звыклымі для горада. Кожную раніцу тут можна назіраць карціну: стаяць перагружаныя аўтобусы, машыны... Каб пазбегнуць аўтамабільных затораў, для зручнасці жыхароў мікрараёна Білева зроблена дадатковая паласа. Гэта дазваляе павялічыць прапускную здольнасць і значна разгрузіць транспартны паток.

Аднак рэканструкцыяй толькі Маскоўскага праспекта праблему ўезду ў горад з боку Білева не вырашыць. Сёння ўвесь транспарт, які накіроўваецца пад чыгуначны віядук з вуліцы Караткевіча, зварочвае налева, накіроўваючыся да праспекта Будаўнікоў, а адтуль – у Лучосу, Маркавічы і далей. Таму пераабсталяванню падвернецца і

перасячэнне праспекта Будаўнікоў і вуліцы П. Баўкі, адкуль у Білева пройдзе транспартная артэрыя. Праектам прадугледжана рэканструкцыя скрыжавання ад Старабабініцкага тракта, вуліц Генерала Іваноўскага і Караткевіча.

– Ужо адселены жыхары гаражнага кааператыва, пабудовы якіх траплялі ў зону рэканструкцыі. Вынесена частка каналізацыйных, электрычных і слабаточных сетак, выкананы пракол пад вуліцай П. Баўкі для вынасу сетак газазабеспячэння, перакладка водаправода ў раёне ветстанцыі. Трансфармаванне магістралей ускладняецца тым, што прайсці трэба пад двума чыгуначнымі пуцямі. Ад Старабабініцкага тракта пераадолелі больш за траціну дарожнага палатна. Каб завяршыць пачатае, неабходны дадатковыя грашовыя сродкі, – падкрэсліў Сяргей Уладзіміравіч.

Яшчэ адным крокам на шляху да пераўтварэння стане «адмарозка» падземнага пераходу на перасячэнні праспекта Будаўнікоў і вуліцы П. Баўкі. Спробы даць яму другое жыццё рабіліся неаднаразова, але беспаспяхова. Пры наяўнасці фінансавання на працягу гэтага года плануецца рэанімаваць адзін з самых старых віцебскіх даўгабудаў.

Вольга БУЛАВА. Фота Дзмітрыя ВОСІПАВА. «Віцебскія вясці».