РЭПАРТАЖ: У Віцебску на Дзень ведаў для школьнікаў наладзілі грандыёзны канцэрт і паказальныя выступленні МНС і МУС
Пасля гарачых летніх канікул хлапчукі і дзяўчынкі Віцебска 1 верасня зноў адправіліся ў падарожжа па школьнай планеце. Іх шлях пачаўся ў Летнім амфітэатры, дзе адбыўся традыцыйны канцэрт «Прывітанне, школьная планета! Мы – ад восені да лета». Каб вучні атрымалі добрыя веды, пра гэта паклапоцяцца настаўнікі. Яшчэ важна захаваць бяспеку кожнага дзіцяці падчас навучальнага года. Гэта ў прыярытэце ў суб'ектаў прафілактыкі. Пра тое, як паводзіць сябе ў любой надзвычайнай сітуацыі, яны раскажуць у рамках акцыі «Адзіны дзень бяспекі», якая сёння стартавала і працягнецца дзесяць дзён.
– Вы сёння робіце яшчэ адзін крок у будучыню. Важна, каб яна была напоўнена добрымі ведамі, якія дапамогуць вам пераадолець любыя цяжкасці, – сказаў начальнік абласнога УМНС Сяргей Мелешкін. – Акцыя «Адзіны дзень бяспекі» накіравана на тое, каб акцэнтаваць увагу дзяцей і іх бацькоў на тых надзвычайных сітуацыях, якія могуць адбыцца з кожным у быце ці на вуліцы.
Добры настрой для ўсіх гасцей мерапрыемства стварылі лепшыя творчыя калектывы абласнога цэнтра.
На пляцоўцы каля Летняга амфітэатра працавалі тэматычныя пляцоўкі, дзе можна было даведацца пяць крокаў выратавання, як працуе аўтаномны пажарны апавяшчальнік, разгадаць шыфр «112», згуляць у пажарнае лато і шашкі і нават прымерыць баявое адзенне ратавальніка. Работнікі Дзяржаўтаінспекцыі УУС аблвыканкама расказалі дзецям аб правілах дарожнага руху. Аб тым, што можа здарыцца, калі пацячэ газ, паведамілі супрацоўнікі УП «Віцебскаблгаз» і ДУ «Дзяржаўны энергетычны і газавы нагляд». З ваеннай службай рабят пазнаёмілі вайскоўцы 103-й Віцебскай асобнай гвардзейскай паветрана-дэсантнай брыгады.
Самыя адважныя хлапчукі і дзяўчаты выпрабавалі сілу духу на атракцыёнах. Так, надзеўшы спецыяльнае абсталяванне, адправіліся ў палатку, запоўненую дымам, і выратавалі ўмоўнага пацярпелага. Аматары вялікай вышыні прынялі ўдзел у «Альпінісце», дзе неабходна было пры дапамозе спецыяльнага рыштунку ўзабрацца на вышыню па скрынях.
Суб'екты прафілактыкі не толькі расказалі, але і паказалі, што адбываецца, калі не прытрымлівацца правілаў бяспекі. Яны прадэманстравалі, як адбываецца пераслед небяспечных злачынцаў, якія хаваюцца на машыне, іх затрыманне, тушэнне аўтамабіля, які загарэўся, аказанне першай медыцынскай дапамогі пацярпелым.