Расійская міліцыя пераймае вопыт беларускіх калег па прафілактыцы ДТЗ у цёмны час сутак

4 верасня, Віцебск /Вольга Багачова - БЕЛТА/. Расійская міліцыя пераймае вопыт беларускіх калег па прафілактыцы ДТЗ з удзелам непаўналетніх у цёмны час сутак. Аб гэтым паведаміў сёння на прэс-канферэнцыі начальнік УУС па Смаленскай вобласці Юрый Сцерлікаў, перадае карэспандэнт БЕЛТА. Акцыю "Абазнач сябе ў цемры" праваахоўныя органы Смаленскай вобласці падхапілі летась пасля знаёмства з вопытам яе арганізацыі і правядзення на Віцебшчыне. "Гэтыя мерапрыемствы па дзіцячай бяспецы зараз актыўна праводзяцца і ў Смаленскай вобласці", - падкрэсліў кіраўнік. Як адзначыў начальнік УУС Віцебскага аблвыканкама Аляксандр Найданко, выкарыстанне флікераў у цёмны час сутак пастаянна пацвярджае сваю эфектыўнасць. Напрыклад, толькі летась дзякуючы гэтай меры колькасць загінулых на дарогах Віцебскай вобласці скарацілася на 25 чалавек у параўнанні з 2007 годам. Наяўнасць флікераў стала абавязковай нормай для ўсіх школьнікаў рэгіёна. "А ў цяперашні час узмацняецца попыт і з дарослых за адсутнасць флікера ў цёмны час сутак", - дадаў Аляксандр Найданко. Расійскія міліцыянеры падкрэслілі таксама значнасць дэкрэта №18 "Аб дадатковых мерах па дзяржаўнай абароне дзяцей у неспрыяльных сем'ях", прынятага ў лістападзе 2006 года. Дакумент, які стаў настольнай кнігай для большасці чыноўнікаў розных ведамстваў Беларусі, з не меншым запалам вывучаецца зараз і ў Расіі. "У нашай краіне праблема дзіцячай неспрыяльнасці і прафілактыкі правапарушэнняў стаіць востра. Таму прынята рашэнне аб вывучэнні станоўчага вопыту работы па гэтым дэкрэце расійскімі профільнымі міністэрствамі", - падкрэсліў начальнік УУС па Смаленскай вобласці. Беларускія прадстаўнікі праваахоўных органаў, у сваю чаргу, зацікавіліся вопытам расійскіх калег па стварэнні грамадскіх саветаў, якія дзейнічаюць пры АУС, у склад якіх уваходзяць прадстаўнікі розных грамадскіх арганізацый, палітычных партый, нацыянальных дыяспар, сродкаў масавай інфармацыі і грамадскасці. Работа гэтых структур, апроч іншых станоўчых момантаў, спрыяе ўмацаванню прэстыжу міліцэйскай прафесіі.-0-