З глобусам у краіну ведаў. Уладзімір Церанцьеў уручыў падарункі першакласнікам Езярышчанскай школы
1 верасня з асаблівым хваляваннем чакаюць не толькі дзеці, але і дарослыя. Бо менавіта з гэтай даты пачынаецца шлях у краіну ведаў, дзе кожнае дзіця Беларусі даведаецца гісторыю сваёй радзімы, вывучае дакладныя навукі, вучыцца пісьменнасці. Гэтаму быў прысвечаны першы ўрок у Езярышчанскай школе, які правяла настаўніца Таццяна Макарава.
Дарэчы, для атрымання годнай адукацыі ў гэтай навучальнай установе створаны ўсе ўмовы. Як расказала яго дырэктар Алена Маўрына, тут ёсць два мульборды, неабходная колькасць камп'ютараў, цалкам абсталяваны кабінеты хіміі, фізікі, працоўнага навучання, адрамантаваны стадыён. За апошнія гады створана сур'ёзная матэрыяльна-тэхнічная база (шмат у чым дзякуючы падтрымцы Уладзіміра Церанцьева). І гэта прыносіць свае вынікі: 75% выпускнікоў школы сёлета паступілі ў вышэйшыя навучальныя ўстановы.
– Кіраўніцтва раёна і яго педагагічная грамадскасць маюць дакладнае разуменне таго, што сістэму адукацыі неабходна развіваць, – адзначыў кіраўнік дэпутацкага корпуса Віцебшчыны. – І для гэтага робіцца нямала. У выніку вучні мясцовых школ займаюць прызавыя месцы як на абласным, так і на рэспубліканскім этапах алімпіяд. Таксама надаецца асаблівая ўвага патрыятычнаму выхаванню падрастаючага пакалення, усім сярэднім установам адукацыі прысвоены імёны герояў Савецкага Саюза, знакамітых землякоў. І гэтая праца будзе працягвацца. Што тычыцца прафарыентацыі, то Гарадоцкі раён – адзін з лідараў у вобласці. Тут бачаць, што патрабуецца моладзь, якая нацэлена на атрыманне рабочых спецыяльнасцей. Радуе, што многія вяртаюцца працаваць на малую радзіму: з 10 маладых спецыялістаў, якія сёлета прыбылі сюды працаваць, сем – выпускнікі мясцовых школ.
Плануецца, што ў наступным годзе менавіта ў Гарадку адбудзецца маштабнае рэспубліканскае свята – Дзень беларускага пісьменства. Яно дазволіць паказаць багатую літаратурную гісторыю як раёна, так і Віцебшчыны ў цэлым.
