Самалёты ўласнай канструкцыі стварае вынаходнік у Шаркаўшчынскім раёне

Жыхара аграгарадка Дварнавое Шаркаўшчынскага раёна Андрыса Баярынша з дзіцячых гадоў вабіла бязмежнае блакітнае неба. Дзякуючы працы і кемлівасці мара стала з'явай. Палёт над роднымі мясцінамі – ужо не сон і не фантазія. Былі б спрыяльныя ўмовы надвор'я, а ўласнаручна сконструяваныя мотапараплан і дэльтаплан гатовыя ляцець угору ў любую хвіліну.

Аднавяскоўцы да гулу рухавіка самаробнага лятальнага апарата даўно прывыклі. І ўсё роўна, заўважыўшы яго здалёк, не адрываючы погляду назіраюць за тым, як бясстрашна парыць ён у паветры, уздымаючыся бліжэй да сонца ці апускаючыся да зямлі.

Спачатку Андрыс Гунаравіч змайстраваў дэльтаплан. Ён значна цяжэйшы і павольнейшы за мотапараплан, які да таго ж з'яўляецца больш мабільным пры транспарціроўцы. Дэталі для ўдасканаленай мадэлі выраблены ў розных краінах. Крыло набыў ва Украіне, рухавік, вінт і яшчэ нешта – у Расіі. Вось так паступова, крок за крокам з асобных невялікіх механізмаў і кавалачкаў металу стваралася сталёвая птушка.

Складана сказаць, што больш прываблівае сельскага майстра: жаданне заваяваць бязмежныя паветраныя прасторы ці па ўласных чарцяжах распрацаваць лятальны апарат, роўнага якому няма ў свеце. Любімае захапленне напаўняе сэрца радасцю, надае сілы і жыццёвай энергіі.

Дзіяна Берніковіч, «Віцебскія весці». Фота з архіва раённай газеты.