Збор подпісаў па вылучэнні кандыдатаў у дэпутаты стартаваў у Віцебскай вобласці

На Віцебшчыне збор подпісаў грамадзян у падтрымку вылучэння асоб кандыдатамі ў дэпутаты пачалі ўсе 48 ініцыятыўных груп, заявы на рэгістрацыю якіх былі пададзены ў акруговыя выбарчыя камісіі.

Камісіі прыступаюць да працы з нацыянальнымі назіральнікамі, так што выбарчая кампанія набірае абароты.

Вылучэнне кандыдатаў у дэпутаты праходзіць з 3 ліпеня па 1 жніўня ўключна і магчыма трыма спосабамі: ад палітычных партый, працоўных калектываў і грамадзян шляхам збору подпісаў. З ліку прэтэндэнтаў, хто ўжо на старце кампаніі вырашыў пайсці у народ разам са сваёй ініцыятыўнай групай, больш за палову з'яўляюцца беспартыйнымі.

З палітычных партый найбольш актыўна на дадзеным этапе заявілі аб сабе Беларуская партыя левых «Справядлівы свет», АГП і партыя БНФ, прадстаўнікі якіх зарэгістравалі адпаведна 5, 4 і 7 ініцыятыўных груп.

Таксама шляхам збору подпісаў грамадзян маюць намер прабівацца ў парламент тры прадстаўнікі ЛДП, па адным ад Беларускай сацыял-дэмакратычнай партыі (Грамада) і «Беларускай сацыял-дэмакратычнай Грамады». Дарэчы, у ходзе папярэдняй парламенцкай кампаніі было 14 адмоваў у рэгістрацыі, працавала ініцыятыўных груп прыкладна на чвэрць менш, пры гэтым і спектр палітычных партый быў бяднейшы.

На Віцебшчыне ўтвораны 819 участкаў для галасавання, у тым ліку 42 з іх будуць размяшчацца ў санаторыях, прафілакторыях, дамах адпачынку і ўстановах аховы здароўя, а таксама ў воінскіх частках. Самым вялікім па іх колькасці стаў Гарадоцкі выбарчы акруга №21, дзе будзе арганізавана галасаванне на 100 участках. Менш за 40 такіх месцаў утворана ў 6 акругах, у тым ліку ў трох у абласным цэнтры. У параўнанні з папярэдняй кампаніяй колькасць участкаў для галасавання скарацілася прыкладна на 9%.

Сяргей Антонаў, «Віцебскія весці». Фота з адкрытых крыніц.