Зборная Віцебшчыны стала найлепшай сярод беларусаў на турзлёце навучэнцаў Саюзнай дзяржавы
Усяго ў турзлёце ўдзельнічала 41 зборная, 7 з іх – з Беларусі. Гэта адно з самых маштабных саюзных мерапрыемстваў для моладзі. У складзе нашай каманды было дзевяць юнакоў і дзяўчат з Віцебска, Оршы, Наваполацка.
Больш за 500 юных турыстаў ва ўзросце 14 – 17 гадоў спаборнічалі ў ўменні праходзіць складаныя дыстанцыі, афармляць насценгазеты, дэманстравалі турыстычныя навыкі і здольнасці экскурсаводаў-краязнаўцаў.
Не абышлося і без забаўляльнай праграмы: дзеці гулялі ў футбол, удзельнічалі ў інтэлектуальных віктарынах, усялякіх конкурсах.
Як распавяла загадчыца сектара турызму і спартыўнага арыентавання Віцебскага абласнога палаца дзяцей і моладзі Святлана Шорнікава, сёлета турыстычная юнацкая зборная Віцебскай вобласці адзначылася і на рэспубліканскіх спаборніцтвах: першае месца па турысцка-прыкладным мнагабор'і ў тэхніцы пешаходнага турызму ў закрытых памяшканнях.
Падтрымліваюць каманду ў яе імкненні да перамог начальнік галоўнага ўпраўлення па адукацыі аблвыканкама Дзмітрый Хома і дырэктар ВАПДМ Дзмітрый Андрэеў.
"Віцебскія весці". Фота прадастаўлена ВАПДМ.