Сям'я з Бешанковіцкага раёна пазмагаецца за званне «Уладар сяла» ў рэспубліканскім фінале

Сям'я Адамовічаў з Бешанковіцкага раёна прадставіць Віцебшчыну на рэспубліканскім этапе прэстыжнага сямейнага сельскагаспадарчага праекта «Уладар сяла — 2016».

Маленькі Ваня ледзь стрымліваў эмоцыі, калі бацькі падводзілі да аўтобуса бычка па мянушцы Уладар. Конкурсныя баталіі, што працягваліся некалькі гадзін, ужо ззаду, галоўным цяпер было даставіць гэты каштоўны падарунак дадому.

У вёску Алаўкі Шаркаўшчынскага раёна сям'я Адамовічаў прыехала, каб узяць удзел у абласным этапе праекта «Уладар сяла — 2016». У чатырох з васьмі тураў Сяргей, Юлія і іх дзеці Дар'я і Іван занялі першае месца, у дадатак двойчы ўвайшлі ў лік прызёраў.

— Мы сельскія жыхары, а значыць, умеем касіць траву, перабіраць бульбу, запрэгчы каня, — адзначае Сяргей. — У конкурсе ўдзельнічалі ўпершыню і рады, што ўсё атрымалася.

Сяргей працуе электраманцёрам у ЗАТ «АСБ-Агра Наватар», а летам — аператарам на сушцы збожжа. Жонка, называючы яго майстрам зварачных спраў, паказвае фатаграфіі аўтарскіх работ: культыватара, катушкі для шланга, мангала, вібрастала для вырабу вулічнай пліткі, дзіцячага сядзення для веласіпеда і многае іншае. Яшчэ адно захапленне — тэхніка. Нявыпраўны стары трактар дзякуючы старанням Сяргея цяпер на хаду.

У адказ на пахвалу муж адзначае, што Юлія, якая па прафесіі настаўніца гісторыі, лепш за ўсіх гатуе, вязаць, стварае кветкавыя кампазіцыі. Сямейная ідылія — яе заслуга. Праект «Уладар сяла», які зарадзіўся ў Глыбоцкім раёне, трансфармаваўся ў масавы конкурс. Па прыблізных падліках, за гады яго існавання толькі на тэрыторыі Шаркаўшчынскага раёна, улічваючы спаборніцтвы ўнутры працоўных калектываў, у ім удзельнічала некалькі соцень сямей.

— «Уладар сяла» — выдатная магчымасць заахвоціць маладыя сем'і, якія дасягнулі высокіх вынікаў у добраўпарадкаванні сваіх дамоў, вядзенні прысядзібнай гаспадаркі, — распавядае першы сакратар абкама ГА «БРСМ» Віктар Глушын.

Так, суддзяў і гледачоў сваім розумам, майстэрствам, любоўю да роднага краю заваявала шматдзетная сям'я з Шаркаўшчынскага раёна, якая заняла 2-е месца. Іван і Дзіяна Малаковы жывуць у аграгарадку Більдзюгі. Муж працуе механізатарам, жонка знаходзіцца ў дэкрэтным адпачынку. У іх растуць Мікіта, Сафія, блізняты Ганна і Наста.

Кіраўнік сям'і захапляецца зварачнымі работамі, яго жонка вышывае. Асабістая падсобная гаспадарка вялікая, ёсць сад і агарод. Пры гэтым Малаковы мараць пра ўласную пасеку, каб на стале заўсёды быў духмяны мёд.

Яшчэ адзін конкурс, якога раней ніколі не было ў праграме, — спаборніцтва касцоў. З хвілінным адрывам ад іншых першым з працай справіўся Валерый Скраго. Праўда, з-за нязначных недахопаў лідарства яму давялося саступіць, і перамагла сям'я Адамовічаў.

Дзіяна БЕРНІКОВІЧ, фота аўтара.«Віцебскія весці».