Сяргей Мелешкін: «Ад кампетэнтнасці і самаадданасці ратавальнікаў наўпрост залежаць здароўе і дабрабыт людзей»
Магутнае аснашчэнне
Мерапрыемства пачалося з наведвання ПАСА «Віцязь». Атрад незаменны на складаных пажарах, дзе неабходна правядзенне аварыйна-выратавальных, вадалазных, хімічных і радыяцыйных і нават альпінісцкіх работ. Дарэчы, зусім хутка «Віцязь» атрымае новую прапіску. Ён пераедзе ў будынак, размешчаны на Старабабінавіцкім тракце ў Віцебску. Такі выбар месца абумоўлены густанаселенасцю найбліжэйшага мікрараёна Білева.
– Мы надаём асаблівую ўвагу паляпшэнню ўмоў службы і побыту работнікаў органаў і падраздзяленняў МНС Віцебскай вобласці. На бягучы год намечана правядзенне мантажна-будаўнічых работ на суму больш за 2 млн рублёў, – паведаміў Сяргей Мялешкін. – Пачата ўзвядзенне новай пажарнай аварыйна-выратавальнай часці ў Полацку, завяршаецца газіфікацыя ПАСЧ №1 у Глыбокім, ідзе капітальны рамонт з элементамі мадэрнізацыі пажарнага дэпо ў Віцебску.
Варта адзначыць, на працягу шэрагу апошніх гадоў адбываецца планамернае абнаўленне транспартных сродкаў за кошт усіх крыніц фінансавання. У бягучым годзе запланавана набыццё дзвюх пажарных 30-метровых аўталесвіц для аснашчэння Браслаўскага і Лёзненскага раённых аддзелаў па НС агульным коштам звыш 1,2 млн рублёў.
Няма перашкод
Для супрацоўнікаў МНС не існуе перашкод, калі гаворка заходзіць аб ратаванні чалавечага жыцця, яны гатовыя прайсці лясныя масівы, скокнуць у ваду, часам ахвяруючы сваім здароўем.
– У летні і восеньскі перыяд людзі часта губляюцца ў лесе. Да іх на дапамогу прыходзіць пошукава-выратавальная служба. На яе ўзбраенні – аўтамабіль пошукава-выратавальных работ, квадрацыкл, багі, спецыялізаванае абсталяванне – квадкаптэр, GPS-навігатары, GPS-трэкеры, альпінісцкае рыштунак, – расказаў Сяргей Мелешкін. – Усяго тут працуе 32 чалавекі. З пачатку гэтага года ПВС выязджала на выклікі шэсць разоў, было знойдзена чатыры чалавекі, з іх два дзіцяці.
На возеры Полонскае ў Варонах журналістам прадэманстравалі сродкі выратавання на вадзе.
– Сёння мы аказваем дапамогу на пошукава-выратавальным катэры RAPTER-550, аналагаў якога на Віцебшчыне няма, – адзначыў Сяргей Мелешкін. – Судна здольнае развіваць хуткасць да 80 км/г, яго грузападымальнасць складае 1200 кг. Наяўнасць катэра, безумоўна, спрыяе найбольш аператыўнаму рэагаванню на ўзніклую НС.
Таксама сучасную тэхніку і абсталяванне абласное ўпраўленне МНС атрымала па праграме міжнароднай тэхнічнай дапамогі «Удасканаленне трансгранічнага супрацоўніцтва ў галіне прадухілення паводак, барацьбы з паводкамі і змяншэння забруджвання навакольнага асяроддзя». У межах яе рэалізуецца два праекты: першы – у галіне прадухілення паводак, барацьбы з імі, другі – па павышэнні гатоўнасці і нарошчванні патэнцыялу рэагавання на надзвычайныя сітуацыі пры дапамозе правядзення мерапрыемстваў па адаптацыі да кліматычных змен.
Важная прафілактыка
У завяршэнне брыфінгу Сяргей Мікалаевіч нагадаў, што любую НС лепш папярэдзіць, чым потым выпраўляць наступствы. На жаль, сёння ў 13 раёнах вобласці назіраецца рост пажараў. У першым паўгоддзі ў рэгіёне іх адбылося 511, у агні загінула 59 чалавек. Асноўныя прычыны ўзгаранняў – неасцярожнае абыходжанне з агнём. Па выніках шасці месяцаў бягучага года 72,8% загінулых знаходзіліся ў стане алкагольнага ап'янэння.
Фарміраванню ў грамадстве культуры бяспекі жыццядзейнасці работнікі абласнога УМНС надаюць асаблівую ўвагу. Яны арганізуюць і праводзяць тэматычныя мерапрыемствы і акцыі, у тым ліку для дзяцей і моладзі, актыўна супрацоўнічаюць з установамі культуры: так, у рэпертуары беларускага лялечнага тэатра «Лялька» з'явіўся шэраг пастановак на супрацьпажарную тэматыку. Важныя напамінкі ад ратавальнікаў размешчаны на прыпынках і ў грамадскім транспарце.
– У цяперашні час наша вобласць з'яўляецца лідарам у краіне па стварэнні цэнтраў бяспекі: першы адкрыўся ў 2017 годзе ў Віцебску, другі – у 2019-м у Барані, трэці – у 2020-м у Наваполацку. У іх прайшло навучанне ўжо больш за 70 тыс. дзяцей. Гэта практычна кожны другі школьнік Віцебшчыны, – дадаў Сяргей Мелешкін. – Эстафету стварэння падобных пляцовак падхапілі мясцовыя органы ўлады. Зусім нядаўна ў Новалукомлі пачаў працу цэнтр прафілактыкі «Альетрнатыва». Не засталіся ўбаку навучальныя ўстановы рэгіёна. Сёлета каманда ВДУ ім. П. Машэрава атрымала перамогу ў абласным конкурсе па бяспецы жыццядзейнасці сярод ВНУ «Студэнты. Бяспека. Будучыня», а на рэспубліканскім этапе стала бронзавым прызёрам.
Словы падзякі
– Сёння міністэрства па надзвычайных сітуацыях — гэта магутная аператыўная структура, якая мае сучасную тэхніку, абсталяванне, высокакваліфікаваных прафесіяналаў, якія ў складаных умовах выконваюць вялікі спектр задач па тушэнні пажараў і ліквідацыі НС, – падкрэсліў Сяргей Мелешкін. – Ад дакладных і зладжаных дзеянняў ратавальнікаў, іх кампетэнтнасці і самаадданасці напрамую залежаць здароўе і дабрабыт людзей, захаванасць сацыяльных аб'ектаў.
Дарагія калегі, ветэраны пажарнай службы, дзякуй за ваша мужнасць. Жадаю вам і вашым сем'ям здароўя, дабрабыту, міру і поспеху. З святам!