Сезон авіятураў з Віцебска ў Балгарыю і Турцыю стартуе 4 чэрвеня
Сезон авіятуры з Віцебска ў Балгарыю і Турцыю стартуе 4 чэрвеня, паведаміў карэспандэнту БЕЛТА кіраўнік упаўнаважанага агенцтва "ТэзТур" у Віцебску, якое выступае заказчыкам рэйсаў, Дзмітрый Рыжык.
Мінулым летам жыхары Віцебска і найбліжэйшых гарадоў упершыню адчулі зручнасць авіяпералётаў з мясцовага аэрапорта. І ў гэтым сезоне таксама, каб трапіць на курорты Турцыі, а цяпер яшчэ і Балгарыі, не трэба ехаць у аэрапорты Мінска і Масквы. Першы рэйс з абласнога цэнтра ў адзін з найбуйнейшых гарадоў Балгарыі Бургас адправіцца 4 чэрвеня, затым 10 чэрвеня адбудзецца вылет у Анталію (Турцыя). Ажыццяўляць перавозку будзе авіякампанія "Белавія" на самалётах Boeing 737-300 (да 150 пасажыраў).
"На першыя рэйсы ўжо ўсе квіткі раскуплены, толькі на 20 і 25 чэрвеня яшчэ ёсць некалькі месцаў, але мы іх хутка зачынім. Гэта вельмі добрая статыстыка продажаў. Нават нягледзячы на тое, што расіян у гэтым годзе менш, ды і ў Магілёве з'явіўся свой рэйс, усё роўна попыт на паслугу вялікі. У асноўным ляцяць Віцебск, Полацк і Наваполацк. Так што ў гэтым годзе плануем выканаць той жа аб'ём перавозак, што і ў мінулым", - дадаў Дзмітрый Рыжык.
Дарэчы, у Турцыю з Віцебска ў 2014 годзе зляцелі 3300 турыстаў. Гэтыя рэйсы пазбавілі гараджан і жыхароў суседніх раёнаў ад дадатковых выдаткаў на трансфер і стомлівага чакання вылету ў аэрапорце.
Працягласць прапанаванага турфірмамі адпачынку на турэцкіх і балгарскіх курортах складае ад 7 да 15 дзён, і гэтаму графіку адпавядае палётная праграма. На ліпень і жнівень толькі пачынаюцца продажы. А апошні ў гэтым сезоне борт у Віцебск вернецца 17 верасня.
Кацярына Князева