Шаты для цялят узводзяць у Віцебскім раёне для новага метаду ўтрымання жывёл

Другі год на малочна-таварным комплексе «Дабрыно» ААТ «Рудакова» Віцебскага раёна выкарыстоўваюцца групавыя дамікі для цялят (на фота). Новы від жылля для «халоднага» метаду ўтрымання жывёл зарэкамендаваў сябе з станоўчага боку.

Па словах спецыялістаў, у шклапластыкавых паўсферы маладняк адчувае сябе камфортна. Пры мінусовых тэмпературах уваход у «бунгала» зачыняецца шчыльнай шторкай. Утрыманне ў групавых даміках аказвае істотны ўплыў на развіццё і здароўе цялят. Яны не пакутуюць ад скразнякоў, дыхаюць свежым паветрам і маюць дастатковую колькасць дзённага святла. У маладняка паляпшаецца апетыт, што адбіваецца на павелічэнні сярэднясутачнага прывасу і эфектыўнасці выкарыстання кармоў.

Структура матэрыялу паўсферы такая, што яна абараняе жывёл не толькі ад зімовага холаду, але і ад летняй спёкі, засцерагаючы ад сонечных і цеплавых удараў. Унутраная паверхня мае цвёрдае гладкае пакрыццё, яго можна хутка і старанна вымыць. У дамку адсутнічаюць стыкі і контуры, у якіх можа назапашвацца бруд. Вялікі ўваход зручны для абслуговага персаналу і доступу свежага паветра. Канструкцыя шатра разам з загараддзю пры неабходнасці лёгка перасоўваецца.

Зараз на комплексе пакуль 4 падобныя домікі, у кожным утрымліваецца па восем цялят. У найбліжэйшай будучыні кіраўніцтва гаспадаркі плануе пашырыць сучасны жылы «мікрараён» для моладзі.

Сяргей Ляшук, "Віцебскія весці"