Шэсць раёнаў Віцебскай вобласці прыступілі да сяўбы азімага рапсу

2 жніўня, Віцебск /Сяргей Кочатаў - БЕЛТА/. Шэсць раёнаў Віцебскай вобласці прыступілі да сяўбы азімага рапсу, паведамілі карэспандэнту БЕЛТА ў камітэце па сельскай гаспадарцы і харчаванні аблвыканкама.

Па даных на 2 жніўня, усяго гэтая культура пасеяна на плошчы каля 550 га, або 1,1% да плана. У пасяўную ўключыліся гаспадаркі Бешанковіцкага, Лепельскага, Шаркаўшчынскага, Талачынскага, Чашніцкага і Сенненскага раёнаў. У бягучым годзе пад азімы рапс плануецца адвесці каля 50 тыс.га. Акрамя таго, усе раёны працягваюць узворванне глебы пад азімыя збожжавыя культуры і ўнясенне гліфасатаў, а таксама прыступілі да ўнясення арганічных угнаенняў пад азімую сяўбу.

Разам з тым асноўны аб'ём работ выконваецца на ўборцы збожжавых ураджаю 2011 года. У цэлым па вобласці збожжавыя і зернебабовыя скашаны на плошчы каля 172 тыс.га, або амаль 38% ад плошчаў, якія падлягаюць уборцы. Намалочана больш за 530 тыс.т збожжа пры сярэдняй ураджайнасці каля 31 ц/га. Лідзіруюць на ўборачнай Чашніцкі раён, дзе збожжавыя скашаны амаль на 56% плошчы, якая падлягае ўборцы, і Глыбоцкі раён (50,4%). Самая высокая ўраджайнасць у гаспадарках Аршанскага (амаль 36 ц/га) і Бешанковіцкага (34,5 ц/га) раёнаў. Традыцыйна самы вялікі намалот атрымліваюць аграрыі Аршанскага (на 2 жніўня - больш за 54,5 тыс.т) і Віцебскага (40,3 тыс.т) раёнаў. У кошт дзяржзаказу гаспадаркі вобласці здалі амаль 80 тыс.т збожжа, што складае каля 43% да плана. Лён выцерабілі на плошчы больш за 6,6 тыс.га, або амаль 36% да плана.-0-