Школа ўзаемнай чалавечнасці" арганізавана ў Віцебску для дзяцей вайны і малалетніх вязняў
Віцебскі абласны палац дзяцей і моладзі прыступіў да актыўнай фазы рэалізацыі праекта "Школа ўзаемнай чалавечнасці", у якім прадугледжваецца задзейнічаць не менш за 300 малалетніх вязняў і дзяцей Вялікай Айчыннай вайны, якія жывуць у Віцебску. Пра гэта паведаміла карэспандэнту БЕЛТА загадчыца аддзела піянерскай работы і дзіцячых рухаў абласнога палаца Наталля Шыбека.
Праект "Школа ўзаемнай чалавечнасці" выйграў грант гуманітарнай праграмы падтрымкі Фонду "Памяць, адказнасць, будучыня" (Германія) у супрацоўніцтве з Міжнародным грамадскім аб'яднаннем "Узаемаразуменне". Асноўнай часткай праекта з'яўляецца арганізацыя навучання пажылых людзей карыстанню камп'ютарам - у групах па выхадных днях і індывідуальна на даму для нерухомых. Таксама ён уключае прадастаўленне паслуг сувязі і пошуку інфармацыі ў інтэрнэце, арганізацыю відэазванкоў па Skype з сваякамі. "Мы ўжо прыцягнулі да гэтай работы каля 80 школьнікаў з нашых гурткоў па інтарэсах, а таксама студэнтаў медуніверсітэта. Але і зараз працягваем набор валанцёраў. Таму што ў першыя выхадныя на заняткі камп'ютарнай граматнасці прыйшлі ўжо каля 70 чалавек, неўзабаве да іх, думаю, далучацца былыя блакаднікі. Акрамя таго, патрэбны валанцёры для наведванняў на даму. Не толькі для заняткаў з камп'ютарам, але і для запісу ўспамінаў, аказання той ці іншай дапамогі", - растлумачыла Наталля Шыбека.
На два гады рэалізацыі праекта яго суб'ектам прадастаўлена 20 тыс. еўра. "Частка гэтых сродкаў ужо выкарыстана для закупкі камп'ютараў і мабільнага інтэрнэту для арганізацыі навучання камп'ютарнай граматнасці, а таксама прадуктовых набораў для нашых нерухомых падапечных. У нас пакуль такіх 12 дзяцей вайны, усе яны атрымалі наборы", - дадала Наталля Шыбека.
У будучыні па праекце прадугледжваецца праводзіць кансультацыі псіхолага (асабіста і анлайн), а таксама частка сродкаў будзе накіравана на арганізацыю сумес ных масавых мерапрыемстваў для пажылых з удзелам валанцёраў. У прыватнасці, запланаваны чатыры экскурсіі па Беларусі, першая адбудзецца ў маі.
Кацярына Князева