Школьнікі Віцебскай вобласці заваявалі 34 дыпломы на рэспубліканскай алімпіядзе
Сёлета фінальная частка інтэлектуальнага марафону праходзіла пазней звычайнага і ва ўрэзаным фармаце – толькі для 11-класнікаў. Але ўдзел для іх сапраўды важны – пераможцы маюць шэраг льгот пры паступленні ў ВНУ.
Паводле інфармацыі галоўнага ўпраўлення па адукацыі аблвыканкама, у фінале ўдзельнічалі 74 навучэнцы. Больш за ўсё дыпломаў заваявана па рускай мове (5), матэматыцы (4), інфарматыцы (4), беларускай мове (3). Лідэрамі алімпіяднага руху ў вобласці сёлета сталі віцебскія гімназіі №8 (6 дыпломаў), №2 (5), №1 імя Ж. Алфёрава (2), Полацкая дзяржаўная гімназія №1 імя Ф. Скарыны (5).
Варта адзначыць, што алімпіяды праходзілі ў розных гарадах краіны з максімальнымі мерамі эпідэміялагічнай бяспекі: дзеці жылі і харчаваліся індывідуальна, не было ўрачыстых мерапрыемстваў. Па некаторых прадметах, напрыклад, замежных мовах, скарацілі колькасць тураў, па фізічнай культуры не было спаборніцтваў у басейне.