Шумілінскі гісторыка-краязнаўчы музей прызнаны лепшым у Віцебскай вобласці
Асноўнымі крытэрыямі пры прысваенні такога статусу сталі выкананне даведзеных планаў і правядзенне новых цікавых праектаў, якія ініцыявалі супрацоўнікі музея. У 2020 годзе экспазіцыі ўстановы культуры, уключаючы філіял у гарадскім пасёлку Обаль, наведалі больш за 10 тыс. чалавек.
Работнікі музея актыўна выходзілі ў медыяпрастору і асвойвалі фармат open air. "Наш музей арыентаваны на мясцовых жыхароў, бо ў Шуміліне няма вялікага патоку турыстаў. І ў 2020 годзе мы пастараліся стварыць для нашых наведвальнікаў максімальна камфортныя ўмовы і наблізіць мастацтва і гісторыю да шырокай аўдыторыі. Для гэтага ў цёплы час года арганізоўвалі выставы на адкрытым паветры. Напрыклад, фотавыставы, прысвечаныя гістарычнай спадчыне Шуміліншчыны, - старадаўнім сядзібам, прыродным помнікам, месцам баявой славы і воінскіх пахаванняў", - распавяла дырэктар музея Святлана Іванова.
Дзякуючы зручным размяшчэнні ў цэнтральным парку гарпасёлка супрацоўнікі музея змаглі задзейнічаць і гэту прыродную лакацыю для стварэння экспазіцый, правядзення квэстаў, гульняў. Пры гэтым у мерапрыемствах і конкурсах, якія ініцыяваў музей, удзельнічалі як юныя, так і дарослыя жыхары раёна. А людзі залатога ўзросту сталі пастаяннымі наведвальнікамі разнастайных экспазіцый і ўдзельнікамі віктарын.
Для ветэранаў працы музей прадаставіў платформу для персанальных і групавых выстаў іх работ - карцін і вырабаў. Жыхары Шуміліна даведаліся шмат новага пра сваіх землякоў, якія выказваюць свой унутраны свет праз творчасць.
Паколькі праводзіць маштабныя мерапрыемствы з-за пандэміі не ўдавалася, работнікі музея правялі нямала конкурсаў у інтэрнэце. "Гісторыя анлайн", "Шуміліншчына памятае", "1100 дзён і начэй да Перамогі" - гэтыя і іншыя віртуальныя праекты дапамаглі пашырыць аўдыторыю і знайсці водгук не толькі ў жыхароў рэгіёну. Да праектаў, прысвечаных 75-годдзю Вялікай Перамогі, далучаліся жыхары ўсёй Беларусі, адгукаліся на іх і расіяне. Дзякуючы гэтаму сталі вядомы імёны многіх савецкіх салдат - ураджэнцаў раёну і тых, хто ў гады Вялікай Айчыннай вайны ваяваў на гэтай зямлі. А яшчэ такія праекты значна папоўнілі фонды музея: дасланыя старыя фота родных і блізкіх ад людзей з розных гарадоў і краін сталі найкаштоўнейшым набыткам і экспанатамі новых выстаў.
Некаторыя пачынанні работнікаў музея знаходзілі водгук і працяг сярод устаноў адукацыі. Так было з праектам "Пошта Перамогі". Навуковыя супрацоўнікі музея распрацавалі дызайн-макет паштовак, у аснове якога былі ўзоры паштовых картак даваенных і ваенных гадоў. Яны размножылі іх і падарылі кожнаму ветэрану вайны, а таксама тым землякам, якія зрабілі вялікі ўнёсак у развіццё раёну. Пазней такія паштоўкі сталі ствараць дзеці ў дзіцячых садках і школах усяго раёну і затым уручаць іх ветэранам.
Сярод мноства напрамкаў дзейнасці ўстановы культуры ёсць і праца з людзьмі з абмежаванымі магчымасцямі. Інклюзіўныя праекты, у якіх людзі з інваліднасцю альбо ўдзельнічаюць, альбо арганізуюць правядзенне мерапрыемстваў, з'яўляюцца адной з фішак музея.
Кажучы пра планы на гэты год, Святлана Іванова адзначыла, што музей чакае пераезду ў новы, больш прасторны будынак, які рэканструюецца да абласнога свята працаўнікоў сяла "Дажынкі", што пройдзе ў Шуміліне. "Разлічваем у новым будынку пашырыць выставачную плошчу і стварыць залу археалогіі. Набор гістарычных артэфактаў у нас ёсць, спадзяемся атрымаць і новыя экспанаты, калі нам іх выдзеліць Інстытут гісторыі Нацыянальнай акадэміі навук, археолагі якога праводзілі раскопкі ў аграгарадку Кордон нашага раёну", - адзначыла дырэктар музея.
Таксама ёсць задумка арганізаваць выставы работ мастакоў-землякоў. У фондах музея маецца каля 400 работ ураджэнца раёна Уладзіміра Белавусава, які працаваў мастаком-пастаноўшчыкам на кінастудыі "Беларусьфільм". Сярод падораных музею работ знаходзяцца яго карціны, эскізы, раскадроўкі да фільмаў. Яшчэ адна калекцыя іншага сына Шуміліншчыны Уладзіміра Іванова прадстаўлена зборам акварэльных карцін. Яна таксама вартая асобнай экспазіцыі, таму ў новым музеі яе прадставяць шырокай публіцы.
"Ідэй вельмі шмат. Хацелася б яшчэ сабраць нашы міні-праекты, прысвечаныя сучаснікам, у глабальныя тэматычныя праекты. Напрыклад, прысвяціць адзін з іх жанчынам нашага краю - шматдзетным маці, заслужаным работніцам, грамадскім дзеячам, - паказаць жаночы твар Шуміліншчыны. І яшчэ расказаць пра гісторыю нашага раёна ад старажытнасці да сучаснасці, дапоўніўшы матэрыял новымі звесткамі аб дасягненнях нашых землякоў", - падзялілася планамі Святлана Іванова.