Найлепшыя лесасекі Віцебшчыны днямі ўзялі ўдзел у абласных спаборніцтвах вальшчыкаў лесу
У першынстве спаборнічалі не толькі майстры галоўнага інструмента — мотапілы, але і спецыялісты па кіраванні сучаснай лесанарыхтоўчай тэхнікай — машыністы форвардараў і аператары гідрааператараў. Удзельнікі прадстаўлялі лесанарыхтоўчыя арганізацыі сістэмы канцэрна «Беллесбумпрам»: «Полацклес», «Віцебсклес» і «Віцебскдрэў»; таксама спаборнічалі члены зборнай з бабруйскага ААТ «ФанДАК» і ААТ «Мастоўдрэў». Вальшчыкі лесу выяўлялі наймацнейшага на базе Курынскага лясніцтва Суражскага лесгаса, «механікі» спаборнічалі ў ААТ «Віцебскдрэў».
Намеснік генеральнага дырэктара па лясной гаспадарцы, лесасыравінных рэсурсах і транспарце «Віцебскдрэва» Мікалай Ціханоўскі, адкрываючы спаборніцтвы, заўважыў, што Беларусь уваходзіць у дзесятку самых лясных дзяржаў Еўропы. А цудоўныя сасновыя боры, бярозавыя гаі, дубровы і выдатныя змешаныя лясы — вынік адказнага стаўлення беларусаў да зялёнага багацця.
— Сярод мэт спаборніцтваў — заахвочванне і прапаганда перадавога досведу, якаснай, прадукцыйнай і, падкрэслю, бяспечнай працы, папулярызацыя прафесіі, — заўважыў галоўны суддзя спаборніцтваў, трэнер нацыянальнай зборнай, кансультант канцэрна
«Беллесбумпрам» Мікалай Патоцкі. — У правілах турніру самае пільную ўвагу нададзена тэхніцы бяспекі. Усе ачкі, набраныя за кошт дакладнасці і хуткасці, можна страціць, дапусціўшы найменшае парушэнне ўмоў аховы працы. Ва ўсім свеце на лесасецы траўмуецца і гіне шмат людзей, па статыстыцы, на здабыты мільён кубічных метраў лесу прыпадае адно чалавечае жыццё. У Беларусі нарыхтоўваецца каля 17 мільёнаў кубічных метраў, а колькасць ахвяр значна ніжэйшая за сусветныя паказчыкі.Часта 1-2 ачкі аддзялялі ўдзельніка ад трапляння на п'едэстал. Да прыкладу, падчас практыкавання
«Валка дрэва» за тры хвіліны ўдзельнік павінен спілаваць высокую сасну і трапіць зваленым дрэвам дакладна па колышку, устаноўленаму ў 15 метрах ад яго асновы, пры гэтым не парушыўшы параметры спілоўвання. За кожны сантыметр адхілення цэнтра ўпалага ствала ад цэнтра колышка ўдзельнік губляе адно ачко. Міліметр або градус адхілення ў параметрах спілоўвання ад устаноўленых велічынь таксама вядуць да істотных страт у ачках. А калі лесасека, напрыклад, не ўклаўся ў пяць хвілін, яму ўжо няма сэнсу працягваць спаборніцтвы.На абласных спаборніцтвах разам з чэмпіёнамі і прызёрамі рэспубліканскіх і міжнародных першынстваў узялі ўдзел дэбютанты, дасведчаныя спецыялісты ахвотна дзяліліся вопытам з пачаткоўцамі.
— У спорце прафесіяналаў я ўжо пяць гадоў, пачынаў юніёрам і цяпер дарос да нацыянальнай каманды, — распавёў вальшчык лесу ААТ
«ФанДОК» Асіповіцкага лесапункта, двухразовы чэмпіён Латвіі Аляксандр Сугака. — У сёлетніх спаборніцтвах спілаваў сасну добра — пень па ўсіх параметрах ідэальны, але ствол упаў з адхіленнем 70 сантыметраў: на гэта паўплывалі прыродныя асаблівасці самога дрэва.Па выніках спаборніцтваў пераможцам у асабістым першынстве сярод вальшчыкаў лесу стаў Аляксандр Сугака, лепшым машыністам форвардара і лепшым аператарам гідраманіпулятара сталі прадстаўнікі ААТ
«Віцебскдрэў» — Аляксей Балотнікаў і Дзмітрый Жукоўскі адпаведна.Дзмітрый КАНАХОЎ, "Віцьбічы"