Сімволічны абрад шлюбу Шагала і Бэлы будзе паказаны падчас "Вясельнай феерыі" у Віцебску

Сімволічны абрад шлюбу Марка Шагала і Бэлы Разенфельд - хупа - азнаменуе 100-годдзе з дня іх вяселля падчас культурнага праекта "Вясельная феерыя "Закаханыя над горадам" у Віцебску. Пра гэта сёння на прэс-канферэнцыі расказалі арганізатары, перадае карэспандэнт БЕЛТА.

Да старту праекта засталося 50 дзён, падрыхтоўка ідзе поўным ходам. Ужо вызначаны асноўныя пляцоўкі "Вясельнай феерыі". І адной з ключавых падзей стане тэатралізаванае вяселле побач з домам-музеем Шагала, праведзенае па ўсіх іўдзейскіх традыцыях, для чаго з Мінска нават запрошаны сапраўдны рабін. А музыку на гэтым абрадзе забяспечаць калектывы са Славакіі, Расіі і Беларусі. Пасля чаго вясельны картэж Марка і Бэлы, а таксама іх "бацькоў" (усе ролі выканаюць артысты тэатра імя Якуба Коласа) праедзе ад вул. Пакроўскай да гарадской Ратушы.

Таксама на "Вясельнай феерыі" запланаваны і іншыя падзеі адпаведнай тэматыкі. Паводле інфармацыі аддзела ЗАГС гарвыканкама, 24-25 ліпеня свой шлюб зарэгіструюць 24 пары. Акрамя таго, культурна-гістарычны комплекс "Залатое кальцо горада Віцебска "Дзвіна" правядзе два абрады "Яднанне маладых", а абласны музей Героя Савецкага Саюза М. Шмырова арганізуе свята для шасці пар, якія, пачынаючы з 2013 года, здзейснілі абрад "партызанскага вяселля". Гэтыя ўстановы запрашаюць усіх жадаючых стаць удзельнікамі тэатралізаваных рэгістрацый па розных сцэнарыях.

На плошчы 1000-годдзя, скверы па вул. Кірава будуць арганізаваны выставы-продажы вясельнай атрыбутыкі, аксесуараў, букетаў, прадэманструюцца кветкавыя вясельныя аркі, будуць працаваць візажысты і мастакі. Побач з тэатрам "Лялька" выстрояцца вясельныя аўтамабілі, на адкрытай пляцоўцы перад рэстаранам "Шварцвальд" пройдзе выстава кандытарскіх вырабаў "Салодкія мары". А па вул. Суворава адбудзецца дэманстрацыя калекцыі вясельных убораў "Муза". Па словах дызайнера Ірыны Красоцкай, спецыяльна для праекта рыхтуюцца не расціражаваныя мадэлі, на якія натхніў шагалаўскі Віцебск, у тым ліку і вінтажная сукенка для Бэлы.

Дарэчы, модная тэма прадстаўлена адразу некалькімі падзеямі. У канцэртнай зале "Віцебск" запланавана дэманстрацыя калекцый нарадаў "Загадка жанчыны", пасля якой гледачоў чакае творчая сустрэча з гісторыкам моды Аляксандрам Васільевым "Жанчыны ў жыцці маім". Васільеў не першы раз у Віцебску, і зноў яго прыезд арганізуе дырэктар "Музея шакаладу" Любоў Іванова. Яна ж у дні праекта адкрые выставу "Модны прысуд у шакаладзе" і яшчэ прэзентуе новыя салодкія копіі работ Шагала (сёння ў музеі выстаўляецца адзіная ў свеце шакаладная копія карціны "Закаханыя").

Кацярына Князева