Прагляд-конкурс ваенных аркестраў прайшоў у Віцебску
На папярэдніх этапах творчага спаборніцтва, што адбыліся ва ўсіх ваенных гарнізонах краіны, выступленні мясцовых артыстаў ацэньвала кіраўніцтва ваенна-аркестравай службы Узброеных Сілаў. Гэты факт накладаў на прэтэндэнтаў дадатковую адказнасць і быў стымулам паказаць сябе з найлепшага боку.
Так, музыканты-армейцы Віцебшчыны спрабавалі заваяваць высокія балы не толькі адточанымі дзеяннямі падраздзяленняў на плацу і віртуозным валоданнем інструментамі, але і выкарыстаннем элементаў, далёкіх ад класічных прыёмаў аркестрантаў, напрыклад, стральбой з аўтамата, танцамі, запальваннем сігнальных шашак.
У выніку сталічныя прафесіяналы вырашылі, што Віцебшчыну ў фінале агляду-конкурсу, які пройдзе ў Бабруйску ў канцы верасня, прадставяць музыканты-дэсантнікі.
— Каб здзівіць журы, мы падрыхтавалі нумары, у якіх нам дапамагалі калегі з ансамбля эстраднага танца Ірыны Бухавецкай, хору абласной філармоніі і барабаншчыкі Віцебскага музычнага каледжа ім. І. Салерцінскага, — сказаў ваенны дырыжор — начальнік аркестра 103-й асобнай паветрана-дэсантнай брыгады Аляксей Суровы. — Праграма падрыхтавана абсалютна новая, разнапланавая і незвычайная. Таму, спадзяюся, мы будзем прызнаны аднымі з найлепшых музычных калектываў беларускага войска.