Парламентарыі Саюзу выступаюць за скарачэнне тэрмінаў зацвярджэння праграм да паўгода

Парламентарыі Саюзнай дзяржавы выступаюць за скарачэнне тэрмінаў зацвярджэння саюзных праграм да паўгода. Аб гэтым сёння журналістам паведаміў старшыня Камісіі Парламенцкага сходу Саюза Беларусі і Расіі па эканамічнай палітыцы, першы намеснік старшыні Камітэта Савета Федэрацыі па навуцы, адукацыі, культуры і інфармацыйнай палітыцы Віктар Касоўра, перадае карэспандэнт БЕЛТА.

Парламентарыі і Пастаянны камітэт Саюзнай дзяржавы падрыхтавалі і накіравалі для ўзгаднення ў міністэрствы і ведамствы Беларусі і Расіі новую методыку фарміравання саюзных праграм. Яе сутнасць заключаецца ў тым, каб ад заяўкі да старту праграмы праходзіла не больш за шэсць месяцаў. Цяпер на ўзгадненне праграм сыходзіць ад паўтары да трох гадоў. "З аднаго боку, для гэтага ёсць аб'ектыўныя прычыны, выкліканыя рознай структурай міністэрстваў і ведамстваў у Беларусі і Расіі, але з другога - шмат бюракратычных цяганін", - лічыць парламентарый.

Новы дакумент будзе ў бліжэйшы час вынесены на разгляд Саўміна Саюзнай дзяржавы.

Чарговае пасяджэнне Камісіі Парламенцкага сходу Саюза Беларусі і Расіі па эканамічнай палітыцы праходзіць сёння ў Віцебску. Яго ўдзельнікі абмяркоўваюць стан і перспектывы гандлёва-эканамічнага супрацоўніцтва Віцебскай вобласці з рэгіёнамі Расіі. У парадку дня пасяджэння таксама абмеркаванне перспектыўнага праекта эканамічнай сферы Саюзнай дзяржавы: канцэпцыі навукова-тэхнічнай праграмы "Стварэнне навуковай і тэхналагічнай платформы фарміндустрыі вытворчасці высокаэфектыўных і біялагічна бяспечных прадуктаў функцыянальнага харчавання, гігіенічных і лекавых сродкаў новага пакалення на аснове лактаферыну і іншых бялкоў чалавека". Праект плануецца да рэалізацыі ў 2014-2018 гадах і рыхтуецца да разгляду на пасяджэнні Савета Міністраў Саюзнай дзяржавы.

Акрамя саюзных парламентарыяў у пасяджэнні камісіі прымаюць удзел прадстаўнікі Пастаяннага камітэта Саюзнай дзяржавы, міністэрстваў і ведамстваў Беларусі і Расіі, навуковай супольнасці дзвюх краін, а таксама кіраўніцтва Віцебскага абласнога выканаўчага камітэта і Віцебскага абласнога Савета дэпутатаў.