Скарачэнне дэпутацкіх мандатаў чакаецца ў Віцебскай вобласці ў наступальную выбарчую кампанію

На гэтым тыдні стала вядомая арыентыровачная дата правядзення выбараў у мясцовыя Саветы дэпутатаў, а выбарчая кампанія павінна стартаваць не пазней 24 снежня пасля выдання адпаведнага ўказа кіраўніка дзяржавы. На Віцебшчыне колькасць народных выбраннікаў у прадстаўнічых органах улады дваццаць шостага склікання скароціцца ў выніку карэкціроўкі адміністрацыйна-тэрытарыяльнага ўладкавання.

Як паведамілі ў прэс-службе Прэзідэнта Рэспублікі Беларусь, па выніках рабочай сустрэчы са старшынёй Цэнтрвыбаркама Лідзіяй Ярмошынай, якая прайшла 2 снежня, Аляксандр Лукашэнка адобрыў прапанову правесці мясцовыя выбары 23 сакавіка наступнага года.

Паводле даных упраўлення арганізацыйна-кадравай работы аблвыканкама, у надыходзячую кампанію на Віцебшчыне трэба будзе выбраць 3218 дэпутатаў, з іх 2329 — у сельскія і пасялковыя Саветы. Агульная колькасць мандатаў скароціцца прыкладна на 8,8% у параўнанні з мясцовымі выбарамі 2010 года, нязменнай застанецца толькі іх колькасць у абласным Савеце (60). У сельскіх і пасялковых Саветах стане менш на 233 месцы (або на 9%), у гарадскіх Саветах — на 62 (амаль на 32%).

Скарачэнне дэпутацкіх мандатаў звязана з аб'яднаннем прадстаўнічых органаў улады Полацка, Оршы з адпаведнымі раённымі Саветамі, а таксама скасаваннем некалькіх сельскіх і пасялковых Саветаў, выкліканым неабходнасцю укрупнення адміністрацыйных адзінак і прывядзеннем іх структуры ў адпаведнасць з заканадаўствам. Такім чынам, агульная колькасць мясцовых Саветаў скарацілася на 6,7% да 224. Выбаршчыкам трэба будзе сфарміраваць абласны, 21 раённы, 5 гарадскіх Саветаў у гарадах абласнога і раённага падпарадкавання, 197 сельскіх і пасялковых Саветаў.

Наступная выбарчая кампанія будзе мець шэраг асаблівасцей у параўнанні з папярэдняй. Паводле Закона "Аб унясенні змяненняў і дапаўненняў у некаторыя законы Рэспублікі Беларусь па пытаннях правядзення выбараў і рэферэндумаў", які ўступіць у сілу на працягу снежня 2013 года, кандыдаты ў дэпутаты атрымалі права фарміраваць свае выбарчыя фонды. Прэтэндэнт на дэпутацкі мандат зможа балатавацца толькі па адным акрузе. Кандыдаты будуць абавязаны пазначаць усе крымінальныя судзімасці, якія мелі месца ў іх жыцці, нават калі яны былі пагашаны або зняты. Акрамя таго, тыя, у каго няма афіцыйных крыніц даходу, будуць пазначаць у дэкларацыі аб даходах і маёмасці крыніцу, за кошт якой яны існуюць. Таксама падчас выбарчай кампаніі пачне дзейнічаць норма, якая забараняе агітаваць за байкот выбараў.

Сяргей Кочатаў, "Віцебскія весці"