Супрацоўнік Віцебскага абласнога ўпраўлення МНС выцягнуў з палаючай кватэры суседа

20 студзеня, Віцебск /Сяргей Кочатаў - БЕЛТА/. Супрацоўнік Віцебскага абласнога ўпраўлення МНС Аляксандр Султанаў выцягнуў з палаючай кватэры нецвярозага суседа па пляцоўцы і з дапамогай падручных сродкаў ліквідаваў пажар да прыбыцця сваіх калег. Аб гэтым неардынарным выпадку, які адбыўся ў Дзень выратавальніка, карэспандэнту БЕЛТА паведамілі ў цэнтры прапаганды і навучання пры абласным упраўленні МНС. Пажар адбыўся ўночы ў кватэры на сёмым паверсе аднаго з дзевяціпавярховікаў абласнога цэнтра. Першай забіла трывогу жанчына, якая пражывае на гэтай пляцоўцы. Яна адразу звярнулася па дапамогу да Аляксандра Султанава, якому, толькі прымяніўшы сілу, удалося пракрасціся ў кватэру нядбайнага суседа, адкуль валіў дым. Вывеўшы з зоны задымлення нецвярозага суседа, 1962 года нараджэння, супрацоўнік МНС аператыўна арганізаваў эвакуацыю жыльцоў для прадухілення атручвання прадуктамі гарэння. Затым разам з імі Аляксандр прыступіў да тушэння пажару з дапамогай вёдраў і вады. Да моманту прыбыцця падраздзяленняў МНС здарэнне было ліквідавана. Прычынай пажару стала неасцярожнасць пры курэнні ў нецвярозым стане непрацуючага мужчыны. Толькі пільнасць суседзяў і своечасова аказаная дапамога дапамаглі пазбегнуць трагедыі. Дарэчы, здарэнне адбылося за некалькі хвілін да заканчэння 19 студзеня, калі адзначаўся прафесійны свята работнікаў МНС.-0-