Супрацоўнікі МНС выпрабавалі унікальную спецтэхніку, распрацаваную на віцебскім прадпрыемстве

«Машинобудаўнічая кампанія «Віцебскія пад'ёмнікі» асвоіла вытворчасць унікальнай пажарнай спецтэхнікі. Сёння аўтагідрапад'ёмнік з уражлівымі грузападымальнымі характарыстыкамі пры мінімальных памерах паспяхова прайшоў выпрабаванні. Правялі іх супрацоўнікі інстытута МНС на палігоне пад Барысавам.

АГП-30 ВІПА зрабілі па замове Саўміна: два гады таму прадпрыемства ўзялося за распрацоўку праекта аўтагідрапад'ёмнікаў, якія да гэтага ў Беларусі не выраблялі. У выніку невялікія габарыты машыны дазваляюць прымяняць яе ў стэснутых умовах — у дварах, на невялікіх вуліцах.

«Мы першыя, хто адгукнуўся, і адзіныя, каму гэта ўдалося. На базе нашага аўтагідрапад'ёмніка з вышынёй 32 м распрацавалі новы мадэрнізаваны варыянт, аснасціўшы яго спецыялізаванымі сродкамі, неабходнымі для пажаратушэння», — растлумачыў дырэктар прадпрыемства Андрэй Сідараў.

Цяпер вядуцца патэнтныя выпрабаванні. «Асноўным патрабаванням наш пад'ёмнік адпавядае. Былі рэкамендацыі па ўдасканаленні, зараз мы над гэтым працуем. У цэлым маем усе дазвольныя дакументы для таго, каб ужо ў бліжэйшы час прыступіць да серыйнай вытворчасці машыны», — адзначыў суразмоўца.

Асвоіўшы выпуск спецыяльнай пажарнай тэхнікі, прадпрыемства выконвае дзве задачы: «Гэта адначасова і замяшчэнне імпарту, і арыентацыя на экспарт. Да гэтых машын ёсць цікавасць у Расіі, Казахстане, Украіне».

У навінцы — невялікі імпартны складнік: 21%. «Для спецыяльнай тэхнікі — гэта мінімальная доля. Выкарыстоўвалі шасі МАЗ, уласныя распрацоўкі, а гэта высокая дабаўленая вартасць. У выніку аўтамабіль атрымаўся таннейшы: у два разы — расійскіх, і ў тры разы — імпартных аналагаў», — адзначыў суразмоўца. Прадпрыемства можа выпускаць па два аўтамабілі на месяц.

«Машинобудаўнічая кампанія «Віцебскія пад'ёмнікі» вядзе гісторыю з 2004 года. Тут асвоілі фактычна ўсю лінейку грузапад'ёмных машын, выпускаюць больш за 50 розных мадэляў, большасць з іх запатэнтаваныя. Штогод на прадпрыемстве ўкараняюць у вытворчасць па 3–5 мадэляў спецтэхнікі. Удзельная вага экспарту – каля 84% ад аб'ёмаў вытворчасці, з іх 70% – пастаўкі ў Расію. Віцебскія пад'ёмнікі таксама эксплуатуюцца ў Казахстане, Украіне, Арменіі, Азербайджане, краінах Балтыі і інш.

Алена Ціханава, БЕЛТА.