Ратавальнікі Віцебска праводзяць прафілактычную акцыю «Не пакідайце дзяцей адных!»

Ратавальнікі ў рамках рэспубліканскай акцыі «Не пакідайце дзяцей адных!», прымеркаванай да Міжнароднага дня сям’і і Дня абароны дзяцей, яшчэ раз нагадаюць дзецям і бацькам аб правілах бяспекі. Прафілактычныя мерапрыемствы пройдуць па ўсёй краіне, у тым ліку на Віцебшчыне, з 11 мая па 1 чэрвеня.

Дзіцячыя свавольствы з агнём і, як следства, гібель непаўналетніх на пажарах — праблема нумар адзін, на якой работнікі МНС зробяць акцэнт. Таксама яны звернуць асаблівую ўвагу на неабходнасць і важнасць навучання дзіцяці бяспечным паводзінам з самага ранняга ўзросту, раскажуць і пакажуць, як сумесны сямейны вольны час можна зрабіць цікавым, разнастайным і карысным, пры гэтым выключаючы бытавы дзіцячы траўматызм.

Першыя тэматычныя сустрэчы адбудуцца з 11 па 15 мая ў гандлёва-забаўляльных цэнтрах, кінатэатрах перад дзіцячымі сеансамі і іншых месцах, прызначаных для сямейнага адпачынку, дзе будуць размешчаны інтэрактыўныя пляцоўкі з навучальнымі конкурсамі, віктарынамі, гульнямі пад дэвізам «Правядзіце час з карысцю».

З 16 па 24 мая ратавальнікі наведаюць радзільныя дамы, дзіцячыя паліклінікі, кабінеты здаровага дзіцяці, жаночыя кансультацыі, школы мацярынства.

А з 27 па 30 мая прадстаўнікі МНС наведаюць шматдзетныя сем'і і дзіцячыя дамы сямейнага тыпу, дзе прадставяць праект «Трымайце дзяцей за руку», правядуць тэматычныя гульні па матывах мультфільма МНС «Чароўная кніга».

Фінальныя мерапрыемствы пройдуць на адкрытых гарадскіх пляцоўках.