Больш за 60 спецыялістаў ветэрынарных службаў Беларусі і Расіі павышаюць кваліфікацыю па пытаннях ацэнкі якасці прадукцыі жывёлагадоўлі на базе Віцебскай акадэміі ветэрынарнай медыцыны.

Як расказаў прарэктар факультэта павышэння кваліфікацыі і перападрыхтоўкі кадраў ВГАВМ Мікалай Матузко, за час курсаў слухачы асвояць тэхналогію і спосабы кантролю якасці розных відаў прадукцыі: малочнай, мясной (у тым ліку субпрадуктаў і каўбасных вырабаў), рыбнай, яек, мёду, а таксама ўпакоўкі і тары. На практычных занятках будуць вывучацца методыкі адбору проб для ветэрынарных даследаванняў, а таксама непрамыя прычыны (напрыклад, якасць кармоў і захворванні жывёл), якія могуць паўплываць на іх вынікі. Акрамя таго, на семінарах спецыялісты правядуць параўнальны аналіз нормаў тэхнічных рэгламентаў прадукцыі дзвюх краін.  
Адзначым, што адукацыйнае супрацоўніцтва  ў галіне ветэрынарыі доўжыцца на працягу некалькіх гадоў. У 2014 годзе 126 спецыялістаў з Беларусі прайшлі навучанне на аналагічных курсах у Расійскай Федэрацыі.

Наталля

Камлёва, «Віцебскія весці». Фота БелТА.