Адразу пяць абноўленых аб'ектаў адкрылі ў Полацку падчас святкавання Дня горада
— Мы пастараліся зрабіць усё магчымае, — адзначыў першы намеснік старшыні райвыканкама Сяргей Лейчанка, — каб у цэнтры Полацка з'явілася яшчэ адна ўтульная зона адпачынку, дзе будуць з задавальненнем праводзіць вольны час і дарослыя, і дзеці. Тут сапраўды праведзена велізарная праца, за якую вялікі дзякуй усім, хто ў ёй удзельнічаў.
Сметны кошт аб'екта, як патлумачыла дырэктар упраўлення капітальнага будаўніцтва Полацка Галіна Бельская, склаў 1 млн 285 тыс. рублёў. Фінансаванне праводзілася за кошт сродкаў раёна пры падтрымцы абласнога бюджэту. Генеральным падрадчыкам выступіла полацкае ТАА «ВилтТоргСервис».
Плошча выкладзена двухкаляровай пліткай, устаноўлены новыя лаўкі, урны, малыя архітэктурныя формы, абсталяваны падпорныя сценкі, разбіты клумбы, заменена асвятленне. Але бачная частка пераўтварэнняў – толькі трэць ад агульнага аб'ёму работ. Астатняе схавана пад зямлёй. Гэта поўная замена і мадэрнізацыя інжынерных камунікацый і, вядома, унутранае абсталяванне новага светладынамічнага фантана – галоўнага ўпрыгожання плошчы.
Яго называюць плоскасным, або сухім, з-за адсутнасці звыклай чары басейна. Струмені вады б'юць прама з-пад зямлі, падаюць на тратуарнае пакрыццё і сцякаюць праз рашоткі ў падземны рэзервуар ёмістасцю 16 тон. Там вада праходзіць спецыяльную ачыстку і вяртаецца на паверхню.
Каля фантана, як расказалі спецыялісты мінскага ААА «Тэхінвестсэрвіс», запрошаныя для мантажу і наладкі складанага абсталявання, 18 фарсунак і тры контуры. Вышыня цэнтральнай пярлістай бруі дасягае 5,5 м, фарсункі ўнутранага контуру круцяцца і таксама фармуюць пярлісты малюнак. Сістэма кіравання цалкам аўтаматызавана. Уключэнне падсветкі запраграмавана праз паўгадзіны пасля астранамічнага заходу сонца.
Яшчэ адной славутасцю плошчы стала дэкаратыўна-мастацкая кампазіцыя ў выглядзе старадаўняга карабля, які плыве «з варагаў у грэкі». Увесь комплекс работ – ад эскізаў да ўвасаблення – выканалі спецыялісты полацкага ТАА «ТВЕН» пад кіраўніцтвам Вячаслава Конькава. Сіламі гэтага ж прадпрыемства выраблены і іншыя металічныя вырабы з элементамі мастацкай коўкі.
Да Дня горада ў Полацку адкрыліся і іншыя значныя аб'екты. Так, на базе СШ №15, рэарганізаванай у адзіны комплекс разам з размешчаным побач дзіцячым садам, абсталяваны дзве новыя групы для дзяцей ясельнага і дашкольнага ўзросту. На рамонтныя работы, набыццё мэблі і сучаснага абсталявання затрачана 75 тыс. рублёў, колькасць месцаў для дзяцей павялічылася на 40.
Акрамя таго, пасля пераезду ў абноўленае памяшканне палепшыліся ўмовы для правядзення заняткаў у аддзяленні дзённага знаходжання для пажылых грамадзян полацкага ТЦСАН. У цэнтральнай гарадской бальніцы капітальны рамонт праведзены ў гінекалагічным аддзяленні, а ў анкалагічным дыспансеры абсталяваны мамaграфічны кабінет для правядзення скрынінгавых даследаванняў для выяўлення раку малочнай залозы на ранніх стадыях. Эканамічны патэнцыял горада працягваюць умацоўваць работнікі ААТ «Полацк-Шкловалакно», дзе завяршылася рэалізацыя інавацыйнага праекта па мадэрнізацыі шклоплавільнай печы №9 у цэху №6, што дазволіць палепшыць якасць прадукцыі і знізіць спажыванне паліўна-энергетычных рэсурсаў.