Тэрміны рэканструкцыі МТФ у Браслаўскім раёне зацягваюцца - Анфімаў

У Браслаўскім раёне зацягваюцца тэрміны рэканструкцыі малочна-таварных ферм. Размова аб гэтым ішла падчас рабочай паездкі старшыні Камітэта дзяржаўнага кантролю Беларусі Леаніда Анфімава ў Браслаўскі раён, паведамілі ў прэс-цэнтры КДК.

Леанід Анфімаў, у прыватнасці, прыняў удзел у пасяджэнні райвыканкама, правёў прамую тэлефонную лінію з жыхарамі раённага цэнтра і азнаёміўся з працай Браслаўскага філіяла ААТ "Глыбоцкі малочнакансервавы камбінат". Так, на пасяджэнні райвыканкама былі падведзены вынікі работы народна-гаспадарчага комплексу Браслаўскага раёна ў 2015 годзе і разгледжаны прагноз на 2016 год. "Леанід Анфімаў абазначыў перад удзельнікамі пасяджэння шэраг праблем. У прыватнасці, у аграпрамысловым комплексе раёна назіраецца напружаная сітуацыя з назапашваннем мінеральных угнаенняў, зацягваюцца тэрміны рэканструкцыі малочна-таварных ферм. Не выкананы прагнозныя паказчыкі, якія наўпрост уплываюць на сацыяльна-эканамічную сітуацыю ў раёне: інвестыцыі ў асноўны капітал, тавараабарот грамадскага харчавання, рознічны тавараабарот і іншыя", - праінфармавалі ў прэс-цэнтры.

Старшыня КДК адзначыў, што Браслаўскі раён павінен у поўным аб'ёме выкарыстоўваць свой прыродны патэнцыял. Праз развіццё інфраструктуры неабходна павялічваць турыстычныя паслугі, што прывядзе да павелічэння росту даходаў рэгіёна. У сваю чаргу рост эканомікі павінен забяспечваць годны ўзровень заработнай платы.

Што тычыцца прамой тэлефоннай лініі, грамадзяне звярталіся да Леаніда Анфімава па зямельных пытаннях, не засталася без увагі работа прадпрыемстваў ЖКГ. "Па ўсіх зваротах былі дадзены канкрэтныя даручэнні, а іх выкананне ўзята на кантроль", - запэўнілі ў прэс-цэнтры.

Таксама старшыня КДК азнаёміўся з сітуацыяй на Браслаўскім філіяле ААТ "Глыбоцкі малочнакансервавы камбінат", асноўным відам дзейнасці якога з'яўляецца перапрацоўка малака і вытворчасць сыроў. У 2013 годзе тут завяршылася рэканструкцыя, дзякуючы чаму прадпрыемства можа штогод вырабляць да 300 т сыроў, 250 т прадукту сметанкова-тварожнага і да 9000 т малочнай сыроваткі. У цяперашні час асноўная частка вырабленай прадукцыі (каля 75%) пастаўляецца на экспарт. У той жа час галоўным стрымліваючым фактарам атрымання большага даходу з'яўляецца недахоп сыравіны (малака), па гэтай прычыне магутнасці завода выкарыстоўваюцца не поўнасцю (на 93%).-

БЕЛТА.